North East Conclave on Urban Poverty Alleviation September ni 15 - 17, 2011 chhunga Aizawl, Mizorama thleng tur tih chu Union Minister (HUPA&C) Pi Kumari Selja remchan zawk angin September ni 16-17, 2011 chhung atan ruahman a ni ta zawk a ni. Union Minister Kumari Selja lo zinna tur leh Conclave atana inpuahchahna kal mek sawiho turin vawiin khan UD&PA Secretary Pu R.Lalrinawma, IRS hovin Agriculture Conference Hall-ah sorkar mi pawimawhte an thukhawm a, Union Minister programme tur pawh duan fel a ni.
Union Minister Kumari Selja chu September ni 16-ah Kingfisher thlawhnain Aizawl a lo thleng ang a, Conclave neihna hmun Assembly Annexe, Treasury Square panpui nghal a ni ang . Conclave zawh hun tlai dar 5:25-ah Press Conference a neih nghal dawn a ni. September 16 tlaiah Union Minister leh palai zawng zawngte pualin Mizoram UD&PA Minister Pu Zodintluanga’n Tourist Lodge-ah zanriah a buatsaih sak dawn a ni.
A tuk September ni 17 zing dar 10:00 ah Chite Sports Complex a hawng ang a, hemi zawhah hian Congress Bhawan a tlawh ang. Hemi hnuah hian Mizoram Governor Pu Vakkom B. Purushothaman nen inkawmna a neih zawhah Lengpui pan nghalin Air India flight-in Delhi lamah a thlawk haw nghal dawn a ni. Union Minister programme hi a tul anga tih danglam theih a ni.
September ni 16-17, 2011 chhunga North East Conclave on Urban Poverty Alleviation-ah hian hmarchhak bial state 8 atangin Chief Minister, Minister leh sorkar official pawimawh tak tak te lo tel thei tura beisei an ni a, an thlenna tur leh Aizawl-a an cham chhunga thil pawimawh leh tul dang hrang hrang vawiin meeting-ah hian sawiho a ni. Conclave tura ruahman felfai tak a awm theih nan a neihna hmun tur Assembly Annexe Building pawh a hmun ngeiah vawiin meeting a tel sorkar officials ten an fang nghal a ni.
