Nimin khan Lungdaiah NLUP trade atana iskut thlangtute zingah Awareness Campaign neih a ni a. Horticulture Department leh Mizoram Iskut Growers Association (MIGA) te buatsaih niin Lungdai bialtu MLA, Youth Commission Chairman ni bawk Pu Hmingdailova Khiangte chu khuallian a ni.

Pu Hmingdailova Khiangte chuan MIGA ten NLUP a iskut thlangtute an hlawhtlinglo ang tih hlauva Awareness Campaign an buatsaih thin chu lawmawm a tih thu a sawi a. Iskut chu State danga Mizo te thlai thar thawn chhuah tlem te zinga a langsar ber leh thawn chhuah tam ber pawl a nih mek thu sawiin NLUP trade a thlangtu te pawhin hlawhtlinpui nana hmang ngei tur leh 2nd Installment dawng tlak a dik taka an sum dawn te hmang turin a chah a. Hahdam taka pawisa ngah thut tum, hnathawh lama thahnemngai leh chuang silo kan nih chuan pawn lam atanga hnamdang lo lut ten kan thawhpeih loh hna min thawhsakin, kan chanpual min chhuh reng dawn a ni, a ti a. Hlawhtling ngei turin taima leh rinawm taka thawk turin kalkhawmte a fuih a ni.

MIGA leh Horticulture tangkawp hian Awareness Campaign tum 4 an buatsaih tawh a. Lungdai bakah Sihphir, Nisapui leh Lungmuatah te nei tawhin Bualpui khuaah neih leh tum mek a ni bawk. Lungdai leh Sentlangah hian NLUP a iskut thlangtu chhungkua 30 dawn lai an awm a ni.

Inkhawm hi MIGA Hqrs Finance Secretary Pu H. Rodinga\'n a kaihruai a. Horticulture Secretary Pu T.Sangkunga, Kolasib Distirct Horticulture Officer Pi Zosiamliani, MIGA Hqrs President Pu Zosangliana Tochhawng leh Lungdai VCP Pu K. Chawimawia te pawhin thu an sawi a ni.