No.7879/2020-2021
Kolasib dated 22nd March 2021: Vawiin chawhnu khan District Level Task Force on Covid-19, Kolasib district-te chuan Covid-19 dona kawnga hmalak tawhna thlirletna hun leh inpuahchah chhunzawm dantur relin thutkhawmna an nei a, Covid19 Vaccination kalpui dan te ngaihthlak a ni.
DLTF Chairman Dr.H.Lalthlangliana chuan thla khat chuang Kolasib district chhunga Covid-19 kai hmuhchhuah an awm rih loh thu a sawi a, hetih rual hian fimkhurna uluk taka kalpui chhunzawm zel a pawimawh thu a sawi. Bairabiah February ni 20, 2021 khan Covid-19 kai hmuhchhuah hnuhnun ber a ni a, Vairengteah January ni 30 kha niin January ni 20 kha Kolasib khawchhunga Covid-19 kai hmuh hnuhnun ber a nih thu a sawi bawk a ni. DLTF anga hmalaknaah memberte thawhhonaah lawmthu a sawi a, sawrkar leh NGO tanrualna a that avangin hrileng dona pawh a sawt phah hle thu a sawi bawk a ni.
Vawiin thutkhawmnaah hian Covid-19 vaccine pekchhuah kawngah beisei angin a dawngtu turte an kal kim loh thin thu tarlan a ni a, hmeichhe naupai, nu hnute pe lai leh naupang kum 18 hnuai lam tih lohte chu vaccine dawng thei tura ngaih an nih thu sawi a ni. Vaccine hi thuang 4-a pekchhuah niin Healthcare worker pek hmasak an ni a, Frontline Worker-te pek chhunzawm leh niin kum 60 chin chunglamte leh kum 45-60 inkar, natna benvawn neite pek an ni leh bawk a ni.
Hmun hrang hrangah Covid-19 hri darh thar leh anga sawi a awm avangin DCHC leh CCC te pawh inthlahdah lova, a tul huna hman mai theiha ruahman dan turte leh Kolasib district chhunga NF Railway hnuaia hnathawk ram pawn mite chu an hnathawhna hmuna tlawhtu awm rih lo tura hmalak dan turte sawiho a ni.
Covid-19 dona kawnga hmalakna hrang hrang ziaka chhinchhiahna bu, ‘Documentation on Covid-19 Volume-I leh II’ chungchang pawh ngaihthlak a ni.
