Vawiin khan  Ruantlang Kelkang Veng chhung Lersia Field chhaka lei tlahniam leh Champhai Kanan Veng a lei tlahniamte rawn enfiahin Disaster Management & Rehabilitation Team  chuan Champhai an rawn tlawh a. DM&R Team hi Pu C.Lalruaia, Join Director (Operation) DM&R chuan a rawn hoin, nimin lamah Khawzawl Vengthara lei tlahniam an rawn enfiah tawh bawk a ni.

Ruantlang Kelkang Veng Lersia Field bula lei che leh hmalak tawh dante enfiah a ni a, he lai hmuna lei che hi  kum 1990 chho bawr vel atanga intan, kum 2000 leh 2013 vel atanga che nasa leh a, kumin June thla vel atanga rawn che nasa zuala chhinchhiah a ni a, lei che hian  a dung metre 56 leh a vang metre 46 vel a zau a awh mek a ni. DM&R Team tena an tlawh leh dang Champhai Kanan venga lei che hi kum 2013 August thla vel atanga che tan niin, lei chein a nghawng leh hmalak tawhnate  enfiah niin, a che zel tur venna tura hmalak dan turte enfiah a ni. 

DM&R Team hian he an zirchianna atanga an thil hmuhte chu  thuneitute    hnenah an thlen leh dawn a, hei aia chipchiar zawka zirchiana enfiahnate pawh a tul ang zela neih tura ruahman a ni. DM&R Join Director (Operation) hi Pu Zarzoliana, Technical Officer, Geology and Mineral Resources Department leh Pu PC Zohmingsanga, AE, DM&R ten an rawn tawiawm a. Champhai lam atangin Pi Rebecca Laldinmawii Hrahsel, BDO Champhai; Pu Lalbiakthuama, EE PWD; Dr Lallawmkima, DIPRO; Pu PC Zoramthara, District Coordinator, DM&R;  Chanchinbumite leh khawtlang hruaituten an tawiawm bawk a ni.