No.3326/2020-2020

Disaster Management & Rehabilitation Minister Pu Lalchamliana chuan vawiin khan Central YMA hnenah bolero camper pakhat leh rikrum thila chhanchhuahna hmanrua (rescue equipment) a hlan. Hemi puala Mizoram Secretariat Building No.1 kawtzawla programme tawi buatsaih hi Chief Secretary Pu Lalnunmawia Chuaungo chuan a kaihruai a ni.

Pu Lalchamliana chuan Central YMA chu rikrum thila Mizo mipuite kut leh ke, tha leh zung, chhiatni thatnia Mizo mipui te tuamhlawmtu an ni tiin Mizo khawtlang tan YMA pawimawhna hi a tawp thei ngai dawn lo, a ti. DM&R Minister chuan YMA leh sawrkar chu pheikhai rual takain kawng tinrengah an thawkho thin a, ramin harsatna chi hrang hrang a hmachhawn mekah pawh YMA chu pawl tangkai leh thawhhlawk, lirnghingin a tihbuai mekte thlamuanpui, COVID19 laka mipui himna tura hmalatu pawimawh a ni, a ti a. Mizoram Chief Minister Pu Zoramthanga hmalaknain rikrum thila hman tangkai theih tur hmanrua te chu YMA ten Mizoram tana tangkai taka an hman atan sawrkarin a pe a ni, a ti.

Central YMA President Pu Vanlalruata chuan rikrum thila chet chhuah pui tur, mi bo leh tui tla zawn nan YMA chuan hmanrua a neih that tawk loh avanga sawrkara dilna a thlen te ngai pawimawha hmanrua engemawzat pek an ni ta chu lawmawm a ti a. A tulna hmun takah tangkai taka hman a ni ang tiin CYMA tan chauh ni lo Mizo mipui tana sawrkarin heng hmanrua te phal taka a pe chu lawmawm a tih thu a sawi a ni.

Central YMA hnena Mizoram Sawrkarin hmanrua a hlan te chu Bolero Camper pakhat, hruihrual meter 50 a sei coil hnih, pulley pahnih, full body harness pahnih, carabineer pathum, figure of 8 pathum, ground sheet panga, four fold stretcher pakhat, pelican search light (model:9410L) pakhat leh rain coat sawmthum a ni.

DM&R hotute bakah, Finance Commissioner, Aizawl DC, SP  leh mi pawimawh dangte programme-ah hian an tel a. DM&R Director Pu John LT Sanga’n report a pe a, DM&R Secretary Pi Lalbiaksangi’n lawmthu sawiin hun hnung a khar a ni.