1640/2023-2024

2023 Thlazing ni 24: Mizoram Sawrkara Disaster Management & Rehabilitation Secretary Pi K. Lalrinzuali chuan vawiin khan Lawngtlai-III leh Lawngtlai Electric Veng lei tla hniam chu a hmunah tlawhin, a dinhmun a enfiah.

DM&R Secretary Pi K. Lalrinzuali hi Lawngtlai Bawrhsap Pu H. Lalhmingthanga leh official dangte leh MJA hruaitute'n ṭawiawmin, Lawngtlai-III bialtu MDC Pu T. Lalengmuana hovin khawtlang thuneitu leh YLA hruaitute'n an lo dawngsawng a. Lei chein a nghawng hmun hrang hrang tlawh kualin, hma lak dan tur te an sawi ho a ni.

DM&R Secretary Pi K. Lalrinzuali chuan May thlaa Cyclone Mocha leh tun hnaia fur khaw cheng avangin hmun hrang hrangah chhiatna a thleng a, chhiatna karah official leh tlawmngai pawlte leh khawtlang mipuite thawh hona a ṭha ṭhin hle tih sawiin, lawm thu a sawi a. Nimin lawka Sairanga rel kawng lei dawh chim chu pawi a ti tak zet tih sawiin, vanduaina karah Mizote chhuanawmna a lang a, mite tlawmngaihnaah lawmawm a tih thu a sawi a. Lawngtlaia lei tla hniam vanga tuartute pawh a tuarpui thu sawiin, chhiatna tuartute tan sawrkarin ṭanpuina leh chhawmdawlna a hun taka pek a tum ṭhin a, sawrkar aṭanga tih tur ṭulte chu theih tawpa bawhzui a ni ang, a ti.

He hunah hian lei tla hniam vanga tuartute chhawmdawlna kawnga hma lak zui zel dan tur leh chhiatna a thlen zel loh nana hma lak dan turte sawi ho a ni a. Lei tla hniam dinhmun chu mi thiamte nen uluk taka zir chian hnuah project lian tham tak ruahman tura hma lak ni se, tih a ni.

Tun ṭum lei cheah hian Lawngtlai Electric Vengah chhungkua 23 chu hmun him lamah sawn niin, in ding lai pahnih ṭhiah a ni a. Chhiatna tuartute chhawmdawlna pawh District Disaster Management Authority aṭangin a ṭul anga bawhzui mek a ni.