1639/2023-2024

2023 Thlazing ni 24: Photo Electoral Roll 2nd Special Summary Revision 2023 neih mek chungchangah vawiin khan Electoral Roll Observer K. Lalrinzuali, IAS, Disaster Management & Rehabilitation Secretary chuan Lawngtlai tlawhin, election official-te, political party, tlawmngai pawl ai awhte meeting a neihpui.

Lawngtlai DC Conference Hall-a photo electoral roll 2nd special summary revision 2023 chungchang meeting-ah Pi K. Lalrinzuali chuan State dang nen khaikhinin Mizoramah kan electoral roll leh inthlan kalpui dan a felfaiin, a thianghlim hle tih sawiin, official, BLO, political party leh tlawmngai pawlte thawh hona ṭha tak avangin tun ṭumah pawh hian electoral roll felfai leh hrisel zawk a awm theih ngei a beisei thu a sawi a. Kumin hi MLA inthlan kum a nih avang leh ram dang aṭanga raltlan eng emaw zat kan kawl avangin roll revision-ah fimkhur a ṭul zual tih sawiin, electoral roll ṭha, dik leh felfai tak nei turin roll-a chuang tur dik takte an chuan a, a chuang lo turte an chuan loh a pawimawh a ni, a ti a. Electoral roll rin tlak a awm theih nan official-te chu fimkhur lehzual tura chahin, political party leh tlawmngai pawlte pawh theih tawp chhuaha official-te ṭanpui zel turin a sawm a ni.

Electoral Roll Observer chuan MLA Inthlanpui kan hmachhawn mai dawn avangin tun hi October 2023-a kum 18 tling tur chin tan electoral roll-a inthun luh thar hun leh siam ṭhat ngai siam ṭhatna hun ṭha a nih thu leh 2023 August thla chhung hun hawn a nih thu a tar lang a. A tlai tawh hnua buaina a awm loh nan, electoral roll-a lo inziak lut tawhte pawhin eng emaw tihsual vanga inpaih leh palh awm thei a nih avangin mahni bialtu BLO hnenah emaw, Voter Helpline App kal tlangin emaw draft electoral roll-a kan chuan leh chuan loh inenfiah nachang hriat a pawimawh hle a ni, a ti.

Electoral Roll Observer hova meeting hi Lawngtlai District Election Officer Pu H. Lalhmingthanga chuan kaihruaiin, kal khawmte lawmna thu a sawi a. Election Officer Pu Denny Lalchhuanawma chuan draft electoral roll dinhmun leh 2nd special summary revision neih meka hma lakna tlangpui a sawifiah a. Electoral roll dik leh felfai tak a awm theih nana hma lak chhunzawm zel dan tura rawtnate sawi ho a ni bawk.

2nd Special Summary Revision, 2023 kalpui mekah hian draft electoral roll-ah Lawngtlai District-a Assembly bial pathum - Tuichawng, Lawngtlai West leh Lawngtlai East-ah vote nei mipa 44,846 leh hmeichhia 44,903, an vaiin mi 89,749 an awm a. India khua leh tui kum 18 tling chin, October ni 1, 2005 leh a hma lama piang electoral roll-a inziah luh thar duh tan emaw, electoral roll-a chuang tawh paih, insawn leh siam ṭhat duhte tan August ni 31, 2023 thleng hun hawn a ni a. October ni 4, 2023-ah final electoral roll chu tar chhuah tura ruahman a ni.