1638/2023-2024

Khawzawl, 24th August 2023: Vawiin khan Khawzawl DC Conference Hall-ah Electoral Roll Observer Pi Lalzarmawii, IAS hovin 2nd Special Summary Revision of Photo Electoral Roll, 2023 chungchangah meeting neih a ni a. He meeting-ah hian Khawzawl District Officials te bakah 22-Tuichang (ST) Assembly Constituency huamchhunga Political Party te, NGO aiawhte leh Mizoram People Forum, Khawzawl Distirct aiawhte an tel a ni.

Electoral Roll Observer Pi Lalzarmawii chuan inthlan hlawhtling taka neih a nih theih nana roll mumal leh felfai tak neih a pawimawh zia a sawi a. Inthlan buaipuitu Booth Level Officer (BLO) te tan training tha tak buatsaih a tul thu te, mipui ten inthlan chungchang an hriatfiah zual theih nan SVEEP Campaign tha taka kal pui a tul thu te a sawi bawk. Khawzawl District-a inthlan buaipuitute chu tha thlah lova thahnemngai taka thawk zel tura fuihin Pi Lalzarmawii chuan September ni 22,2023 thleng hian 2nd Special Summary Revision chungchangah hearing hawn a ni tih a tarlang bawk a ni.

He hunah hian Khawzawl Election Officer Pu Timothy R. Lalhmangaiha chuan report a pe a.

Tuichang bial chhungah hian vote nei mi 17,440 - mipa 8,690 leh hmeichhia 8,750 an awm mek tih a tarlang a. Mipa aiin hmeichhe vote nei hi mi 60 in an tam zawk a ni. Special Summary Revision 2023 Final Roll January ni 1,2023 nena khaikhinin 2nd Special Summary Revision Draft Roll (August ni 2,2023) ah hian vote nei hi mi 42 in an pung a; roll atangin mi 59 - mipa 32 leh hmeichhia 27 paih an ni thung. Polling Station voter tam berna chu Khawzawl Vengthar North niin voters 1025 an awm a, vote nei tlemna ber Arro khuaah voters 114 an awm a ni.

Meeting zawh hian Pi Lalzarmawii hian Khawzawl khaw chhunga Polling Station pahnih - Khawzawl Electric Veng PS leh Hermon PS te a tlawh a, Khawzawl DC Pu K. Lalrohlua , SP Pu Lalchhuanthanga, EO Pu Timothy R. Lalhmangaiha leh official dang ten he hunah hian an tawiawm.