2993/2024-2025

Dated Aizawl, the 14th November 2024: Vawiin khan Chief Minister Pu Lalduhoma leh DoNER Minister Pu Jyotiraditya M Scindia te kaihhruai Review Meeting, Planning & Programme Implementation Conference Hall-ah neih a ni a. Ministry of Development of North Eastern Region kaltlanga Mizorama hnathawh hrang hrangte an thlirho.

Chief Minister chuan, kan DoNER Minister hi a pa Pu Madhavrao Scindia te nen khan thian tha tak kan ni a. Chuvangin Pu Jyotiraditya M Scindia pawh hi fate ang maiin ka en a ni. DoNER Ministry hi an pawimawh em avangin Delhi kan zin apiangin ani nen hian kan inhmu a, min tanpui turin a inpeih at reng a, Mizoram min duhsak em em a ni. A hova Review Meeting hun tha tak kan nei thei hi ka lawm a, Mizoram tan rah tha tak a chhuah ka beisei, a ti a. DoNER kaltlanga project kalpui meka harsatna awm leh rawtna a neih te, Mizoramin project thar a mamawhna lai te a tarlang bawk.

Pu Jyotiraditya M Scindia pawhin thusawiin, Chief Minister Pu Lalduhoma leh ka pa te lo inthian thatna avangin Mizoram hi ka ngaina a. He inlaichinna thinlung hi thawhhona tha zawk awmtirtuah hman ka duh. Project endik ringawt turin ka lo kal lo va, kan focus area-a kan zirchianna leh hmasawn zel tura in mamawh rawtna tha tak tak ka rawn keng a ni. Mizoram hi khawchhak lama India chhuahka, hmun pawimawh taka awm a ni a, tihmasawn zel turin kan inpeih a ni, a ti. He review meetingah hian hmasawnna nghet leh khuarei daih Mizoramin a hmuh a, hmalam a pan zel theihna tur sawihona leh ruahmanna te neih kan duh a, Project kal meka harsatna in neihte chu a theih ang angin kan lo bawhzui zel ang, a ti.

Dr. Md Nazmuddin, Sr. Economic Adviser, DoNER, chuan DoNER Ministry in hmasawnna huang thenkhata Mizoram dinhmun tlangpui leh hmalak zelna tur rawtna a neihte a tarlang a. Chung an rawtna te behchhan chuan sawihona an nei zel bawk.

Pu Vanlaldina Fanai, Commissioner, Planning chuan DoNER kaltlanga Mizorama hmalaknate sawifiahna a nei ve bawk.

Meeting-ah hian Pu H. Lalengmawia, Chief Secretary, chuan inlawmna thu a sawi a. DoNER project kalpuitu department changtu Minister te, Pu Chanchal Kumar, Secretary, DoNER leh DoNER official pawimawhte bakah Mizoram sawrkar official pawimawh te an tel a ni.