Vawiin hian Secretary, Ministry of DONER Pu Naveen Verma, IAS chuan Lawngtlai a tlawh a, DONER Ministry hnuaia Non-Lapseable Central Pool Resources hmanga hmasawnna hnathawktu Department hotute leh Autonomous Councils pathum hotute nen DC Conference Hall ah Meeting an nei.

Pu Naveen Verma chuan, India sawrkar chuan hmarchhak State te mamawh dik tak thiamna leh theihna pek a duh a, chutiang atana Scheme dik siam a tul a ni, a ti a. A chhunga chengte theihna leh chu an theihna tihmasawn tura ruahmanna siam thiam a pawimawh a ni, tiin cultural dress mawi tak tak an tahte chu DONER in India ram khawpui lian zawka zawrhsak a inhuam thu a sawi a ni. Hmarchhak bial tana Central sawrkar in sum tam tak a chheh hran hi a thlawna luanral tir mai lova mipuite chawikan nana hmang ngei turin kalkhawmte chu a ngen a ni.

DONER Secretary rawn tawiawmtu Pu VB Pathak, Jt Secretary, DONER leh Pu JK Sinha, Jt Secretary te pawhin thu an sawi a, District Council pathum LADC, MADC leh CADC hotuten an harsatna an sawite pawh an ngaihthlak saka, hmalak zui dan turte an sawipui bawk a ni.

Pu Naveen Verma hi Jt Secretary pahnihte bakah hian Pu Saihlira, Adviser Planning Department chuan Aizawl atangin a rawn tawiawm a, Lawngtlaiah hian Addl. DC Pu R. Lalsangluaia leh SP Pu Lalsanglura, IPRO Pu K. Saitluanga leh NLCPR hmanga hnathawktu Department hrang hranga hotute bakah LADC, CADC leh MADC CEM te leh Official pawimawhten an lo dawngsawng a, DC Conference Hall a meeting hi Pu R. Lalsangluaia’n a kaihruai a ni.