Pu R.Vijaykumar, IAS, Secretary, Ministry of DoNER, Government of India chuan vawiin chawhma khan Animal Husbandry & Veterinary Department enkawl vawk vulhna leh enkawlna hmun Selesih chu a tlawh a, AH&Vety hotu ten Mizoram vawk vulh dinhmun leh department hmalak dan te an lo hrilhfiah. DoNER Secretary hian vawk chi lakna Regional Boar Semen Station leh AH&Vety Directorate office thlanga ran damlo enkawlna tur Polyclinic sak thar pawh a tlawh nghal bawk. AH&Vety Department chhinchhiah danin tuna Mizoram puma vawk vulh zat chu 3,66,646 a ni a, vawksa hi kumtin 7038 tons eiral thin a ni bawk. Kum 2014-2015 chhung khan vawksa mamawh 14,543 tonnes a nih laiin Mizoram chhunga dehchhuah chu 12,525 tonnes a ni thung. Kum 2014-2015 khan vawk chi 4891 sem a ni a, a hralhna atangin Rs 3,25,100 /- sum hmuh a ni bawk. Polyclinic hi DoNER sum Rs 347.26 lakhs hmanga sak a ni a, hawn theih thuai tura beisei a ni.

DoNER Secretary hi Pu M.Iboyaima Meitei, Adviser (Agriculture & Allied), Ministry of DoNER-in a rawn tawiawm a, AH&Vety Commissioner Pu K.Lalnghinglova leh AH&Vety hotute leh Planning Department hotu ten an lo kaihruai a ni.