“Sorkar sum hi keimahni sum a nih anga inremchem leh hlawk taka kan hman a tul”, UD&PA Minister Pu Zodintluanga chuan a ti. He thu hi vawiina Department of Personnel and Administrative Reforms (DP&AR) leh Mizoram Civil Service Association te tangkawp buatsaih “Resource Mobilization and Fiscal Discipline” zirhona workshop, Mizoram Legislative Assembly Annexe Conference Hall-a a hmanpui tuma a sawi a ni.

Pu Zodintluanga chuan neitu thinlung pu chunga ‘financial propriety’ chu sorkar officer ten an neih a tul em em a. Chutiang lam zir tura MCS officer-te'n hun an buatsaih chu a lawmawm hle tiin sorkar sum kalphung te hriaa neitu nihna nen hna an thawh a pawimawh em em a ni, a ti. Minister chuan sorkar sum kalphung hi midang hriat leh buaipui tura dah chi a ni lova, sorkar sum kalphung enkawlnaah hian officer te’n mawh an phur tih hre tur leh workshop an buatsaih chu sum kalphung zir chhuahna leh ke pen tharna hmanraw pawimawh a nih a beisei a. Sorkar sum dinhmun hi fiscal policy leh management-ah thui tak a innghah avangin hmathlir thui tak neia state sum enkawl leh hman a nih theih nan policy tha taka duan a ngai a ni, a ti a. Sorkar sum kalhmang leh nih phung hi officer zawng zawngte hriat tur a ni a, a bik takin MCS officer te phei chuan an ngaihven tak meuh hi a tul lehzual niin a sawi.

State sorkar sum hmuhna hnar, State Own Resources chu tax leh non- tax revenue atanga lo kal a ni thu sawiin Pu Zodintluanga chuan Mizoram sorkar pawhin state sum dinhmun siamthat nan kawng hrang hrangin hma a la a ni, a ti a. Sum hmuh belh tluka pawimawh chu sum neih sa hman tangkai a ni tiin sum kan neih ang ang hi tha taka hman a nih chuan sum thawk chhuak tluk kan ni thei a, tun hnaiah sorkar chuan sum renchem leh fimkhur taka hmanchhuah lamah tan a la a, hei hian rah tha a chhuah ngei a beiseiawm a ni, Pu Zodintluanga chuan a ti bawk.

Workshop hi Session 2-ah then a ni a, Session khatna hi MCSA President Pu Lalzirmawia Chhangte, Addl.Secretary School Education chuan a kaihruai a, chawhnu programme hi RD Deputy Secretary Pu V.Lalengmawia’n a kaihruai. Prof Vanlalchhawna, Deptt of Economics, Mizoram University chuan Centre-State Financial Relations & Central Finance Commissions tih thupui hmangin thu a sawi a; Fiscal Management & Fiscal Policy chungchang Pu Vanlalmawia MCS, Joint Director, UD&PA-in a sawi bawk. Chawhnu-ah Financial Propriety in Government thupui hmangin Pu Frederick Syiemlieh, Sr. Deputy Accountant General, Mizoram-in sorkar sum hman dan dik leh kalphung a sawi bakah Pu CC Lalchhuangkima, Project Director, DRDA, Champhaiin Resource Mobilization in Government thupui hmangin thu a sawi bawk a ni.

Attachment

  • Loading attachment...