Home Minister Pu R. Lalzirliana chuan vawiin khan Champhaia Hmeichhe V/C thlan tlinte chawimawina MHIP Sub-Headquarters in Champhai Venglai Community Hall-a an buatsaih chu a hmanpui. He hunah hian Parliamentary Secretary Pu TT Zothansanga, ZOHANCO Chairman Pu R. Vanlalvena, Champhai DC Pu H. Lalengmawia, SP Pu RP Meena leh official dang ten Minister hi an tawiawm a ni.

Minister Pu R. Lalzirliana chuan hmeichhe V/C thlan tlinte chu a lawmpui thu sawiin, an hmabak a an mawhphurhnate tha taka an hlenchhuah theih nan a duhsakna a hlan a. Roreltu dinhmuna dingte chuan nun dan tawk an hriat a pawimawh thu tarlangin, mahni chauh inngaihtuaha thiltihtheihna hmachhuan vak chingte chuan ngaihsan an hlawh thinloh thu sawiin, rinawmna nen Pathian hre reng chunga kan hnam nun chawisang chunga mawhphurhna hlenchhuah chu kan nihna in a phut a ni, a ti. Minister chuan Sorkarin nasa taka hmeichhe dinhmun siamtha tura hma a lak thin thu sawiin, chumi zingah chuan Dan, The Mizoram Marriage, Divorce and Inheritance of Property Act peihfel a nih hnu ah VC inthlan a reservation siam a ni leh zel chu hmasawnna pawimawh tak leh hmeichhiate tana chanchin lawmawm tak a nih thu a tarlang a ni.

Home Minister chuan MLPC Act chungchang sawi kaiin, kum tam tak chhung MLTP Act hman a nih chhungin zu lei tur a kiam phah chuanglo mai nilovin, crime a tam reng tho a. Chunvangin a zirchiang tur committee din a nih hnuah MLPC Act chu chhawpchhuah a nih thu tarlangin, he dan thar hnuaiah hian hremna a nat zawk mai bakah, community work thawk tura inhremna chuan awmzia a nei thui hle nia a hriat thu a sawi a. He dan hian milian leh mi te a thliar loh thu leh, dan bawhchhia an nih phawt chuan mi thiltithei leh theilo in awmzia a neih loh thu a tarlang a. Mitinin he dan hi ngaithiam se a duh thu Home Minister chuan a tarlang a ni.

Parliamentary Secretary leh Champhai North bialtu MLA Pu TT Zothansanga pawhin thu sawiin, MHIP ten an hmeichhe pui V/C tlingte chawimawi nachang an hria chu lawmawm a tih thu a sawi a. Mizo hmeichhiate dinhmun hi a tha tawklo thin hle a, tunah erawh sorkarin dinhmun tha zawkah a hlang kai chu vanneihna nasa tak a nih thu a sawi a. VC dinhmun luahtute tan thil thar zir leh hriat tur tam tak a awm chhoh zel tur thu sawiin, thahnemngai taka zir chho zel turin leh, an member pui mipa te nena inpuihbawma thawhhona tha tak an neih a beisei thu a sawi a. Hmeichhia chu chhungkua leh khawhtlang khalhngiltu pawimawh ber an nih avangin roreltu hmeichhia tam zawk neih thar a nih chu lawmawm a tih thu Parliamentary Secretary chuan a sawi a ni.

Pu R. Vanlalvena, ZOHANCO Chairman chuan khawtlang nunah hmeichhiate pawimawhna tarlangin, hmeichhe reservation siam a ni hi lawmawm a tih thu a sawi a. Roreltu dinhmuna awm chu chetzia leh tawngkamah fimkhur a pawimawh thu a sawi a. Mihringte hi zahawm kan tum luatah zahawma min siamtu te lo palzut mai hi a awl a ni tiin, mahni mawhphurna hre reng chunga rorel turin kalkhawmte chu chah a ni.

Champhai DC Pu H. Lalengmawia pawhin thu sawiin, Village Council-ah mai nilo, Sorkar inrelbawlna sang zawkah pawh hmeichhe tam zawk tel zel se a tih thu leh, hmeichhe V/C tling tharte chu member satliah mai nih tum lo a, member tangkai tak nih tum theuh turin a chah a. Finna leh zir san ringawt hi thlensanna a nilova, mahni inrintawkna leh tumruhna hian kori a su zawk a ni tih hre reng turin DC chuan kalkhawmte chu a chah a ni.

Tun dinhmunah Champhai District-ah hian V/C thlan tlin hmeichhe VC 125 an awm a ni. Chawimawina thuziak (citation) hlan theuh an ni a. Vawiin inkhawm hi MUP Champhai hruaitute leh District chhung Block hrang hrang a MHIP hruaituten an telpui a ni.