Vawiin khan DoNER Secretary, Govt. of India Pu Naveen Verma chuan Lunglei a rawn tlawh a; Lunglei DC Pu Abhijit Vijay Chaudhari hovin District officials ten lo hmuakin Lunglei Circuit House Conference Hall-ah DoNER hnuaia Lunglei huamchhunga Project kalpui mekte an sawiho. DoNER Secretary hi DoNER Jt. Secretary pahnih, Pu V.B.Pathak leh Pu J.K.Sinha, bakah Mizoram sorkara Planning Adviser Pu Saihlira ten an rawn tawiawm a ni.

DoNER Secretary Pu Naveen Verma chuan officials-te nena meeting an neih hmain Lunglei Chanmari-a Indoor Stadium sak mek chu a hmunah an tlawh thu leh a sakna hnathawh dan a lungawi thlak an tih thu a sawi a. Ministry of DoNER chu Ministry dang zawng zawng nena an thawhho dante tarlangin Pu Verma chuan Ministry tin hian an budget atanga 10 chu DoNER-ah an chhunglut a, heng sum tlingkhawm sorkar kum 1 chhunga DoNER hnuaia sum awmzat thei chu Cheng vaibelchhe 2200 a ni, a ti. He Non-Lapsable Central Pool of Resources (NLCPR) hmangin DoNER chuan hmarchhak bialah Project leh Scheme hrang hrang atan sum a bultum sak thin a ni tih a sawifiah. DoNER chuan hmarchhak bial atan kawng 2-in chak taka hmalak a duh chu eizawnna lam (livelihood) leh skill development a ni a, Mizo thalai lehkhathiam emaw themthiamna (skill) tha neite, eizawnna nghet la nei si lote chuan Project siamin NEDFI kaltlangin DoNER-ah an thehlut thei a ni tih Pu Verma hian a sawi bawk. Tunlai khawvel thlir chungin, Ministry tin te chuan 'skill development' hi an ngai pawimawh hle a nih tih sawiin DoNER Secretary chuan mipuite ngaihdan/duhdan hriat phawta, NGO hrang hrangte nen tangkawpin Project siam thin turin department officials te a chaha; an kaihhnawih Ministry website theuhte tlawh ngun a, project leh scheme dil theih chhawpchhuah tharte hmelhriat a, hemi kawngah chak zawka hma an lak a duh thu a sawi a. Pu Verma chuan Department tin ten Project siam a an hnenah thehlut turin a hrilh a; mipuite chanvo tichak lehzual turin DoNER chuan an website-ah 'social audit window' a buatsaih thar a, smartphone nei tupawhin DoNER hnuaia Project kalpui mekte thla lain, fakna tur emaw sawiselna tur emaw an hriat chuan an post thei reng a ni, a ti bawk.

DoNER Jt.Secretary Pu J.K.Sinha pawhin thusawiin NERLP hnuaiah Lunglei District RD Block 4-ah Self-Help Group (SHG) dinna turin sum pek tawh a nih thu leh Lunglei District-ah chuan horticulture, handloom leh piggery project te a hlawhtlin theih an rin thu a sawi a. SHG-te chu NEDFI leh bank dangte nen inzawm that a pawimawh thu a sawi a; heng SHG ten awlsam zawka loan an hmuh theih nan Bank hrang hrangte pawh hrilhhriat (sensitise) a tul a ni, a ti. Mizo kuthnathawktu ten an thlai tharte hralhchhuahna turah harsatna an tawh thin chu NERAMAC kaltlangin ruahmanna siam sak an tum thu te, Handloom lamah pawh NEHHDC nena tangkawp tur te, USRA kaltlanga Education loan a dil theih thu te bakah Agriculture & Horticulture lam scheme leh project dil theih engemawzat a awm thu te a tarlang. DoNER Jt.Secretary Pu V.B.Pathak chuan Lunglei-a DoNER bultuma project kalpui mek - 1).Indoor Stadion, Chanmari; 2).Zauva Sailo Tennis Complex; 3).110km Transmission Line Project leh 4). Boys & Girls Hostel - chungchang report an dawn dante tarlangin a kaihhnawih department officials te nen chipchiar takin an sawiho.

Vawiin chawhnu vek khan DoNER Secretary Pu Naveen Verma te chuan Lawngtlai an pan nghal a ni.