Vawiin khan Accounts & Treasuries Conference Hall-ah computer hmanga awlsam zawk leh chak zawka Pension siamna tura ruahman, Pensioner’s Database Management System (PDMS) chu Finance Minister Pu Lalsawta’n a hawng.

Khuallian, Finance Minister Pu Lalsawta chuan thu sawiin Acounts & Treasuries Department-in pensioner-te harsatna a lo chinfel sak thin chu, pensioner kalphung la hre ngailo leh an chhungte tan a a hlu em em a ni, a ti a. PDMS tangkai dan tur sawiin Minister chuan, “Dik leh fel fai zawk, rang leh hahdam zawk bawk si in thawktu tlem zawk hmangin pension hi kan chingfel thei zar zar tawh dawn a ni,” a ti a. Minister chuan PDMS hnuaiah chuan file hlui sang tel, rit tak tak kha awm tawh lovin file tlemte chauh hmangin hna a thawh theih tawh dawn a ni, a ti bawk.

Khuallian chuan computer atanga Pension lehkha (Pension Payment Orders) hmet chhuakin PDMS hi a hawng a, PDMS hmanga siam Pension Payment Orders chu pensioner thar thlan bik mi pangate hnenah a hlan nghal bawk. PDMS hawnna inkhawm hi Finance Commissioner Pi L.N. Tochhawngin a kaihruai a. Accounts & Treasuries-a Chief Controller of Accounts, Pu R. Lalbiakthanga chuan PDMS siam tura an hmalak dan report a pe a.

PDMS siam tura rawih M/S Spectra Consultancy Pvt. Ltd. atangin PDMS kalphung leh an hmalak dan ngaihthlak a ni bawk. Hawnna inkhawm hi Finance Department Secretary Pu F. Vanlalruata chuan lawmthu sawiin a khar a ni.

PDMS hi 13th Finance Commission in pensioner leh family pensioner-te database siamna tura sum a pek hmanga siam a ni a. Kolkata-a M/S Spectra Consultancy Pvt. Ltd. leh Accounts & Treasuries Department-a pension khawihtu officer leh staff-ten Mizoram pension kalphung mil turin an duang a. Pension file hlui digitization pawh kalpui mek niin tunah hian Pension file 4173 lai digitized tawh a ni a. August ni 25, 2015 atanga pension case lut thar apiang chu PDMS hmanga tihfel niin, tunah hian case 323 chinfel a ni tawh bawk.PDMS hi pension siamnan mai bakah pay, leave leh thil dang dang chhutnan pawh hman tangkai thei a ni dawn a. Mobile SMS alert hmangin pensioner-te chu hriattirna pek thin an ni dawn bawk a ni. PDMS hian nasa takin thawktu indaihlohna leh Stationery senso sang tak pawh a chhawk zangkhai hle dawn a. Pay Revision pawh lo awm mahse, PDMS hi awlsam taka her rem theih a nih dawn avangin pensioner-te leh la pension zel turte tan a tangkai hle dawn a ni.

PDMS hawnna inkhawmah hian Finance Department leh Accounts & Treasuries Department officer leh staff-te an tel tha hle.