Social Welfare leh Tribal Affairs changtu Minister Dr.K.Beichhua chuan vawiin khan Shastri Bhawan, New Delhi ah Union Minister of State for Tribal Affairs Pi Renuka Singh Saruta hmuin Mizorama Eklavya Model Residential School chungchanga hmalaknate an sawi dun.

Tun dinhmunah Mizoramah Eklavya Model Residential School hi pahnih – Pukpui, Lunglei leh Kawlritlang, Serchhipah a awm a, Ngopaah building sak zawh tawh a ni bawk. Mizoram chhunga block pathumah building sak mek niin block pangaah sak tan a ni tawh bawk.

Dr Beichhua chuan Mizoram chu Tribal Area a nih angin Block 26 huamchhungah EMRS hawn vek tuma hmalakna kalpui mek a ni tih Union Minister hnenah hian sawiin Block zawng zawngah EMRS hawn vek a nih chuan zirna kawngah Mizoramin nasa takin hma sawn tur thu a hrilh a. Union Minister chuan hmalakpui a tum thu leh EMRS Noaotla, Siaha District leh EMRS Tlungbel sakna atan cheng vaibelchhe 14 release nghal a nih tur thu Minister hnenah hian a lo hrilh a ni.

EMRS pakhat dinna atan hian sawrkar laipui chuan cheng vaibelchhe 24 zel a dah a, school pakhatah zirlai naupang 400 chuang zel awm theihna tura ruahman niin CBSE course kalpui a ni. Sawrkar chuan he school-ah hian zirlai naupang enkawlna senso mi pakhat tan kum khat zelah cheng nuai 1.9 zel a tumsak vek bawk a ni.