2438/2024-2025

Dated Lawngtlai, 9th October, 2024: Mizoram Journalist Association (MJA) General Headquarters leh Home Department buatsaihin vawiin chawhma dar 11:00 khan   “One Day Seminar on Cyber Crime Programme” chu Lawngtlai Press Club-ah neih a ni a. Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan khuallian niin a hmanpui.

Dr. Lorrain Lalpekliana Chinzah chuan seminar chhima lo kalte hnenah lawmthu a sawi hmasa a. Internet hian hmasawnna tam tak, a tha leh tha lo lam a thlen mek tih tarlangin a hmangtute fimkhur thiam a tul hle a ni, a ti. Mizoramah ngei pawh Internet kaltlangin Social Media hrang hrang hmanna a hluar hle a, hei vang hian internet kaltlanga  inbumna leh pawikhawihna  chungchang hriatchian  a tul hle a ti a. Social media hmang thiam leh hmang  tangkaite chuan sum leh pai thawk chhuakin, eizawnna tha tak  pawh an nei ngei a, mahse a chhe zawnga hman avangin ram leh hnam pawhin  nasa takin a tuar thei tih hriat a pawimawh hle a ti.

Khuallian chuan social media platform hrang hrang chu hlim hlawpna, nawmchenna leh  mi sawisel zawnga hmanna a tam hle tih tarlangin, hei hian nakin lawkah thubuai lian tak awrh thei dinhmunah min siam thin  tih hriat a tul hle a ti a. Cyber Crime chungchang hriatchian loh avanga inbumna a hluar hle ni a ahriat thu tarlangin, Dr. Lorrain Lalpekliana Chinzah chuan internet hmangtute 'cyber crime' leh 'cyber laws' hriatchian tum hram hram turin a chah a. Internet- in ramri kham  chin a neih  loh avangin, mi bum tum leh sual rawngbawl nana hmang an tam tih hriat a, fimkhur a pawimawh tak zet a ni, a ti.

Dr. Lorrain Lalpekliana Chinzah chuan dan tha taka zawm hi 'cyber crime' laka filhlimna  tha ber a nih thu tarlangin, a bik takin Information Technology (IT) Act, 2005 -  zirchiang a, zawm a tul hle a ti a. Mizoram University in kum 2021- a zirchianna an neih atanga a lan danin, za zela 61.4 chauhin IT Act an hrechiang tih tarlangin Adviser to Chief Minister chuan 'Cyber Crime' chungchang inzirtirna  (awareness)  neih that hi thil tul tak a ni, a ti. Mizoram sawrkarin 'cyber crime'  a ngaipawimawh tak zet a,   Chief Minister ngeiin "Seminar on Cyber Crime" khuhhawnna a nei a, sawrkarin 'cyber crime'  laka Mizoram mipuite him nan theihtawp a chhuah zel dawn  a ti. MLA chuan Lawngtlaiah ngei pawh Internet leh Social Media hmang an tam hle tih tarlangin, vawiin seminar-a kalte an pawimawh takzet tih a sawi a. Mithiam  zawkten  zirtirna tha tak an pek chu uluk taka ngaithla  tur leh  midangte zirtir chhawngtu ni theuh tura sawmin duhsakna a hlan nghal.

Seminar hi Pu C. Lalrambuatsaiha, President, MJA, Gen.Hqtrs. chuan kaihruaiin, Pu Elvis Lalthanzuala, Lawngtlai District MJA President chuan kalkhawmte lawmna  thu a sawi a. Pu K. Zothanpara, General Secretary, MJA Gen. Hqrts. chuan report tawi pekna neiin,  Pu  Jeremia  Vanlalhmachhuana, Dy SP, Cyber Crime,  chuan Cyber Crime chungchanga hriat tur hrang hrang zirtirna pein, zawhna leh chhanna hun hman nghal a ni bawk.

Vawiin 'One Day Seminar on Cyber Crime' ah hian sawm bik - SP Office, Traffic Police, Lawngtlai District Vilage Council Association,  Central Young Lai Association ( CYLA), Lai Students' Association (LSA), Lawngtlai Auto Rickshaw Owners Association aiawh te bakah  DIPRO leh  Information Department, LADC an tel thei a. Pu Lalchhandama, Secretary, MJA Gen. Hqtrs. chuan lawmthu sawina neiin hun a khar.