2461/2024-2025
Dated Lawngtlai, 10th October 2024 : Vawiin khan Dr. Lorrain Lalpekliana Chinzah, Adviser to Chief minister leh Lawngtlai East bualtu MLA nibawk chuan Ngengpuilui Lei dawh hawnna a nei a, Pu R. Lokeshwaran, IPS, Superintendent of Police (SP) Lawngtlai chuan a tawiawm a ni.
Dr. Lorrain Lalpekliana Chinzah chuan India khua leh tui, Mizoram leh a bik takin Lawngtlai mipuite leh a mamawhtu zawng zawngten tha leh tangkai taka hmang tura lawm taka Ngengpuilui Lei dawh a hawng thu a sawi a. He Lei dawh a nih theih chhan ber sawrkarlaipuia Ministry of Defence leh a bik takin Pu Rajnath Singh, Defence Minister, hmalakna fakawm a tih thu a tarlang bawk. He Lei dawh hna thawktu 71 RCC Border Roads Organisationv(BRO) Lawngtlai, hnathawh fakawm a tih thu sawiin MLA chuan Lawngtlai mipuite tana an hnathawh zawng zawngah thinlung taka lawmthu hrilhin, an hnathawh leh inpekna chu Lawngtlai mipuiten an theihnghilh ngai dawn lo a ni, a ti.
Adviser ro Chief Minister chuan vawiina hawn tak Lei dawh hian Ngengpui khua leh Khawmawi tan inkal pawhna awlsam zawk a siam mai a ni lo a, sawrkarlaipuiin a ngaih pawihmawh em em 'Act East Policy' atak a tihhlawhtlinna kawngah awmzia neiin, a tangkai dawn hle a ti . Mizoram sawrkarin 'Chamdur Project' a ngaipawimawh hle tih tarlangin MLA chuan he project hlawhlinna turin inkalpawhna tha tak a ngai a, vawiina leidawh tha tak avang hian Chamdur Project pawh chak zawka kalpui thuai a ni ang a, Lawngtlai West bial chu Mizoram ei leh bar a chawmtu ber (Rice bowl of Mizoram) a ni thei thuai dawn tih a tarlang.
Dr. Lorrain Lalpekliana Chinzah chuan fur ruahrui tlak nasat avangin kawngpuiin nasa takin a tuar a, hmun hrang hrangah leimin pawh a nsa hle a ti a. A bik takin buhfai phur motor lian ten Bungtlang South chauh an thleng thei tih tarlangin, hei hian buhfai chungchangah harsatna lianzawk a thlen a hlauhawm hle a ti a. FCI godowns - ah monsoon stock, buhfai a tlem tawh hle tih tarlangin, Bungtlang South piah khua hrang hrangten harsatna an tawh lohna turin 71 RCC Border Roads Organization - te chu tun thla chhung ngeia buhfai phur motor lian kal theih tura kawngpui siam tha turin a ngen a. 71 RCC BRO - ten an enkawl mek Lawnglai to Parva kawng (Km-160) a thui pawh a hma thei ang bera cheihnawm leh siam tha turin a ngen nghal bawk.
Vawiina hawn tak Ngengpuilui Bridge hi metre -125 a sei niin, sawrkarlaipuia Ministry of Defence kaltlanga dawh a ni a, 71 RCC Border Roads Organization (BRO) ten Lei dawh hna hi an thawk a ni.
