1175/2026-2027

Lawngtlai, 25th June 2026: Nasha Mukt Bharat Abhiyaan - hnuaia 'Viksit Bharat ki Pehchaan Programme' kalpui mekah vawiin khan Deputy Commissioner Office buatsaihin 'International Day Against Drug Abuse & Illicit Trafficking' chu DC Conference Hall-ah hman a ni a. He hunah hian Dr. Lorrain Lalpekliana Chinzah Adviser to Chief Minister ( H&FW, A& FW) leh Lawngtlai East bialtu MLA nibawk chuan khuallian niin a hmanpuia, bawrhsap Pu Donny Lalruatsanga chuan hun a kaihruai.

Dr. Lorrain Lalpekliana Chinzah chuan kalkhawmte chibai bukna neiin, Ruihhlo do kawngah theihtawp chhuah chhunzawm zel turin a sawm a. Ruihhlo hmansual, dan lova zuar leh tawlhrukin khawvel a tibuai nasa hle tih tarlangin, hetiang karah hian Lawngtlai District - pawhin theihtawp chhuah do leh umbo tura hmalak chhunzawm zel a pawimawh hle a ti a. A bik takin ruihhlo thatlohzia inzirtirna kawngah rahbi thar kaia, uar zawka kalpui a tul hle a ti. Ruihhloin mimal, Khawtlang, ram leh hnam tan harsatna leh buaina a thlen nasa dan ngaihtuahin, tih takzeta do tlan a tul hle tiin, Lawngtlai District- mipuite a do kawngah thawhpuiah a sawm a ni.

Khuallian chuan Ruihhlo Do kawngah Ruihhlo laka inven chu tihmakmawh hmasa a ni tih sawiin, mahni theuh inven thiam a tul hle a ti a. Vawikhat tihchhinin ngawlveina a thlen thei tih hriaa, thalaite chu tichhin lo turin a chah a. A bik takin zirlaite chu an ziarlai chauh ngaipawimawha, hlawhtlinna chang tura theihtawp chhuah turin a fuih a. Ruihhlo do kawnga sawrkarin 'Operation Jericho' a kalpui mekah, Bawrhsap Office ,Police, NGO, VC, MJA leh Kohhran ten theihtawp an chhuah thin chu lawmawm a tih thu tarlangin, hmalam pan zel turin a chah a. Ruihhlo bawia tang mekte chhanchhuah kawnga thawktute chhuanawm a tih thu tarlangin, beidawng lo a thawk zel turin a fuih a. Ruihhlo hmansual leh dan lova sumdawnna tirem turin mitinin tangkaina an nei tih sawiin, Dr. Lorrain Lalpekliana Chinzah chuan theihtawp chhuah zel turin kalkhawmte leh Lawngtlai mipuite a sawm nghal bawk.

DRS (CYLA),Gilead Drop- in Center, Excise & Narcotics Department leh Lairam Rescue Center- te atangin 'presentation' ngaihthlak niin, Ruihhlo do kawngah thawk thate- SP Excise & Narcotics Department, CYLA leh MJA Lawngtlai hnenah 'Aprreciation Certificate ' hlanna neih nghal niin Khuallian Dr. Lorrain Lalpekliana Chinzah chuan a hlan a ni. International Day Against Drug Abuse & Illicit Trafficking - pual hian thu intiamkamna neih a ni a, Pu Zonunchama Ralte, (DIPRO) chuan a kaihruai a ni.

Vawiin hun hmannaah hian Lawngtlai bawrhsap Pu Donny Lalruatsanga chuan kalkhawmte lawmna thu a sawi a. Sawrkar Department, NGOs,MJA, leh Zirlaite an tel thei a, Pi Malsawmtluangi, Superintendent, DC Office, chuan lawmthu sawiin huna a khar.

International Day Against Drug Abuse & Illicit Trafficking- hi kum tinin June ni 26 - ah khawvel pumah thupui thlan bik neiin  hman thin a ni a. Kumin bikah chuan sawrkar chawlh a nih avangin ni 25, June ah hman niin,  thupui atan hian “Foresight and innovation in action: forging solutions for the world drug problem” thlan  a ni.