1176/2026-2027

Aizawl the 25th June 2026: Vawiin khan Dawrpui Multipurpose Hall-ah International Day against Drug Abuse & Illicit Trafficking hman a ni a, Chief Minister Pu Lalduhoma chuan khuallian niin a telpui a. Zirlai naupang kalkhawm leh a thusawi ngaithlatu zawng zawngte hnenah ruihhlo chu an ban phak maiah a lo awm reng a nih pawhin hnar ngam a, tichhin lo turin a chah a. "In nunna chhuhsak tur cheu a Setana thlemna hmanrua a ni. Mi tam takin an tichhin a, an inrin hman hmain a bawihah an lut a, an chhungkua a tichhe vek phawt a, thlanmualah a umlut zui thin", a ti.

Pi Lalrinpuii, Social Welfare Minister, Pu Lalnghinglova Hmar, Excise Minister, Pu K. Laldawngliana, MLA bakah Pu Khilli Ram Meena, Chief Secretary leh official pawimawhte, zirlai naupangte an tel a, kalkhawmte hian ruihhlo laka fihlim tur leh do zel turin an intiam a ni.

Chief Minister thusawi tlangpuite chu:

1. Kum 2024 khan International Day against Drug Abuse & Illicit Trafficking Day hi Vanapa Hall-ah ka hmanpui tawh che u a. Khatihlai vel khan Aizawl kawtthlerah leh district capital lamahte chenin ruihhlo ngai, Ngawlvei vak vel hmuh tur an la tam hle a. An video te pawh a viral thin a nih kha.

Sorkar, tlawmngaipawl leh kohhran hoten theihtawp kan han chhuah zui a. Supply lam ringawt danchah tum lovin, demand lam tihtawp pawh kan tum a. Security Coordination Committee kan din a, Ruihhlo Do Core Committee kan tinung thar a, Operation kan kalpui a. YMA ten kumpuanah Ruihhlo Do an puang a, Anti-Drugs Squad an kalpui a, chhun-zan zawmin hma an la a. Kohhran hrang hrangte thawhpuiah kan sawm a, kohhran huang chhunga lo sawi tam turin kan ngen a. Zirlai naupangte zingah awareness kan kalpui a, media campaign a kal reng bawk a.

Demand Reduction lamah Ngawlvei enkawlna hmun hrang hrangte kan thawhpui a, Hulhhliap Short Stay kan kalpui a. Kum 2024-a he ni kan hman tuma ka sawi ang khan - Sethawn Jordan Centre pawh Synod nen kan thawkho tawh a ni.

Hetianga sorkar, tlawmngaipawl leh kohhran hote pheikhai rual taka kan kal avang hian hma kan sawn hle a. Tunah chuan kan kawtthler velah Ngawlvei tei rawlai hmuh tur an lo tlem ta hle mai. Chhanchhuahna chang a, nunphung pangaia kir leh ta pawh tam tak kan nei tawh a ni.

2. Kan lo sawi tawh thin angin, kan chhak lawkah ruihhlo siamchhuahna ram an awm a, an rawn tawlhchhuahna hmatawngah kan lo awm si a. Do nasa viau mahila, tihrem vek hi a har thei. Chuvangin, ruihhlo hi kan ban phakah awm reng mah se, ti lo tura kan inven a, kan hnar ngam a ngai.

Mi thiamte sawi danin, ruihhlo laka himna tha ber chu tihchhin loh hi a ni a. Mi tam takin an tichhin a, “A ngawl ka vei zui chuang lo vang” ti reng chungin reiloteah a ngawl an vei zui mai thin. Vawiina lo kal khawm zirlai naupangte leh ka thusawi lo ngaithlatu zawng zawngte hnena ka ngenna chu - Ruihhlo chu i ban phakah awm reng mah se, tichhin suh - tih hi a ni. I nunna chhuhsak tur chea Setana thlemna hmanrua a ni. Mi tam takin an tichhin a, an inrin hman hmain a bawihah an lut a, an chhungkua a tichhe vek phawt a, thlanmualah a umlut zui thin.

3. Ruihhlo hmanga sumdawngtute hi mipuiten i enliam lo vang u. Midang nunna laksaktu, an chhungkua tichhe vek thei, an thlarau lam thlenga tihlum thei - ruihhlo zawrh chingte hi kan enliam mai mai tur a ni lo.

An chhungril chhiatzia hi a lo lang chhuak fo mai. Tun hnai mai pawh khan Mizo nula, Bangkok atanga rawn haw tur Suitcase-ah Heroine an man thu kan lo hria a. An thil zawrh kha mi nunna tichhetu a nih tawh hnuah, a ken kualna (trafficking) lamah midangte an la bum duh zel thin.

Mizote hi thil inthawn mai thin kan lo ni a, kan hmelhriat leh thian thate thil a nih phei chuan han hnarte hi kan lo hreh a. Harsa harsain kan kensak hram hram thin. Chutianga, Zo nun ze mawi kan lantirnate chu remchangah lain, chhungkaw bungraw pawimawh anga sawiin an ruihhlo chu midang an kentir ta a. Mi tha tak takin man an tawh phah a, Jail-ah te an lut a ni.

Mipuite hian ruihhlo zuar ru ka hria emaw rinhlelh kan nei a nih chuan thuneitute hnenah report zel ila, an phu tawk hremna hmu ngei rawh se.

4. Kumina kan Day thupui hi ‘Persisting Issues, New Challenges, Innovative Responses’ tih a ni a. Khawvelah Synthetic Drug te a lo chhuak a, a thehdarhtu lam Criminal group-te an pung a, Technology thar ber ber hmanga drug thehdarh thute a lo pung zel a. Ruihhlo kaihhnawih sualna thar a chhuak nasa a. Heng sualna thar lo chhuak zelte dolet thei tura kan intuaihriam zel hi a ngai.

Technology thar heng, drone kan tihte hmanga Drug Trafficking tite pawh kan lo nei ru reng tawh mai thei. Misualte hian min fin khalh ang a, kan hnung lam atangin min nuihsawh ang tihte hi a hlauhawm.

Demand reduction lama awareness kan kalpuina kawngah pawh tunlai mil takin, evidence base campaign kan uar a tulin ka hria.

Ruihhlo laka kan ram venhim te, ruihhlo bawiha tang lo tura thangtharte hnena zirtirte hi kan hna pawimawh, kan ram leh kan hnam humhimna hna a ni tih hre thar ila. Kan puanven te sawi chhingin, nasa zawka bei turin ke i pen ang u, tihte an ni.

Pi Lalrinpuii, Social Welfare, Women & Child Development Minister te, Pu Lalnghinglova Hmar, Excise & Narcotics Department te, Pu Khilli Ram Meena, Chief Secretary leh Pu R. Lalngheta, CYMA President te pawhin thu a sawi bawk.

He ni pual hian mi bik thlanchhuahte hnenah chawimawina hlan an ni a. Chung mite chu:

Category 1: Infiamna huang.

1. Cindy Remruatpuii Colney, Footballer
2. Samuel Zadeng, Boxer

Category 2: Rahbi tleu enkawltu huang.

1. New Life Home Society Jeriko Khualbuk, rahbi tleu hmeichhiate enkawlna, mi 5000 an enkawl tawhtu.

Category 3: Ruihhlo sima, ngawlvei chhantu ni zuite huang:

1. Jimmy LNS Tluanga, kum 23 chhung ngawiveite chhanchhuah hna lo thawk tawh leh

2. B. Lalrinpuii, kum 7 zet ngawlveite tana thawktute an ni.

International Day against Drug Abuse & Illicit Trafficking hi Social Welfare, Women & Child Development, DC Aizawl, Health & Family Welfare, Excise & Narcotics, I&PR, Higher & Technical, School Education, IG Prison, Assam Rifles, BSF, MRHG & CD, MSACS, CYMA, MKHC, HMIP, MDUF leh FINGODAP ten tangruala an buatsaih a ni a. A ni tak chu naktuk 26th June hi a ni nain sorkar chawlh ni (Holiday) a lo nih avangin vawiin hian hman a ni ta zawk a ni.