1177/2026-2027 

Siaha the 25th June 2026: International Day against Drug Abuse & Illicit Trafficking chu vawiin khan DRDO Conference Hall, Siaha-ah hman a ni a, Addl DC Pu Abraham Beirazi Khithie chu Khuallian a ni. June Ni 26 a hman thin nimahse kuminah sawrkar chawlhah a tlak avangin vawiin hian hman a ni.

Pu Abraham Beirazi Khithie chuan Siaha District in ruihhlo a dona kawngah theihtawp chhuah thintute chungah lawmthu a sawi a, National level, State level, District Level leh Village Level thlenga Ruihhlo dona kawnga hma la thin Committee hrang hrang tarlangin an chungah lawmthu a sawi. Ruihhlo do rem turin sawrkar hmalakna ringawt a tawk lova. Chhungkua, Khawtlang leh kohhran tan tlan a ngai tiin tha thlah a thiang lo a ti.

Siaha-a Ruihhlo ngaite enkawlna hmun pahnih - Agape Home leh Kalvary Healing Centre hnathawh a ropui hle a ti a. Ruihhlo bawiha tangte tanpui a, an talchhuah theih nana theihtawp an chhuah thinnaah lawmthu sawiin an hnathawhte hriatpui a, puih theihnaah puitu ni theuh turin kalkhawmte a chah.

Addl DC chuan ruihhlo bawiha tang tawh tal chhuak thei chu za zelah 7 chauh an ni a, talchhuah a harsat zia hriaa tichhin miah lo turin a chah. Vawikhat tihchhin chuan tih zel duhna a hring a, chu chuan addiction a thlen mai thin avangin la tichhin ngailote tilo tura inzirtirna (awareness campaign) uar lehzuala neih a tul thu a sawi bawk a ni.

Infrastructural Developmentah inelna nasa tak a awm a, a lawmawm hle rualin infrastructure tha tak tak awm mahse a chhawrtu tur thalaite ruihhloah an fihlim chuan siloh chuan awmzia a awm dawn lo tiin thalaite hriselna ngai pawimawha, District nuam leh ruihhlo laka fihlim District siam turin mitin theihtawp chhuah a pawimawh hle a ti a ni.

Siaha Block BDO Pi Zorinsangi pawhin thusawina tawi neiin MzSRLM hnuaia Self Help Group te pawhin ruihhlo do kawngah theihtawp an chhuah thin tih a sawi a. Self Help Group intelkhawm Village Organisation (VO) ten Vawiin Drug Free Day denchhanin ruihhlo tilo tura intiamkamna hmun hrang hrangah an buatsaih thu a tarlang. MzSRLM hnuaia scheme hrang hrang awmte sawizauna a nei a, trade hrang hrangah a mamawhte tan a thlawna training buatsaih reng a nih thu leh placement pawh an ngaituah sak thin tih tarlangin zirlai naupangte leh thalai te ngaihven turin a chah a, awmawl chu sual punna a ni tiin MZSRLM hnuaia scheme awmte ngaihvena bawhzui turin a chah a ni.

He hun hi Pi LS Lalbiakzuali, DSWO , NMBA Member Secretary nibawk chuan a kaihruai a, Pi N Rosalyn, Coordinator, Mera Yuva Bharat, Siaha chuan resource Person niin ruihhlo thatlohna leh a ngawng sawizauna a nei a ni. Pu Ng Lalbiaknunga kaihhruaina hnuaiah ruihhlo tilo tura tiamkamna (pledge taking) neih niin Pu Vanlalchhuanliana, SDO (S) chuan lawmthu sawina neiin hun tawp a khar.

Vawiin International Day against Drug Abuse & Illicit Trafficking hi Nasha Mukt Bharat Abhiyan (NMBA) leh Mizoram State Rural Livelihoods Mission (MzSRLM) buatsaiha hman a ni a, Kumin thupui atan ‘A drug free India is the true identity of a developed India’ tih chu thlan a ni.