1174/2026-2027

Dated : Mamit the 25th of June, 2026 :  Vawiin khan Mamit District Drug Disposal Committee hmalaknain District Hospital incinerator-ah Mamit District chhunga damdawi leh ruihhlo man hrang hrangte halralna hun hman a ni a, Pu Suvigya S Chandra, IAS District Bawrhsap chuan ruihhlo halralna hun hi a hmanpui. 

District Bawrhsap chuan ruihhlo man tawh sa hetiang zat hal ral tur a awm chu lawmawm a tih thu a sawia, ruihhlo leh a kaihhnawih hian kan ram mai bakah Mamit District chhungah pawh chhungkaw tam tak min tibuaia, ruihhlo do tur hian tihtak zeta hma kan lak a tula, a man chhuah kawngah Police te tha tichaktu nia thawhpui atan khawtlang hruaitu leh tlawmngai pawlte chu a sawm a ni. 

Vawiina ruihhlo halral te hi Mamit PS leh West Phaileng PS atanga man Heroin 118.08 grams leh Meth 1.89 kg te niin local market a chhutin Rs. 48,41,400/- (nuai sawmli pariat singli sangkhat zali) man hu a ni. Ruihhlo man khawm halral tur hi Mamit District Drug Disposal Committee te chuan uluk taka an endik hnuah leh man a nih laia a zat nen a in mil em tihte endik a nih hnuah halral tura ruahman a ni. 

Vawiin ruihhlo halralna hunah hian Pi C. Lalbiaksiami, Addl SP, Pu Lalnunfela Chawngthu, SDO (S), Dr. Lalrinfela H, Medical Superintendent te bakah tlawmngaipawl aiawhte leh khawtlang hruaitute an tel a ni.