No.6530/2020-2021

Vawiin khan Dr. Pachuau Lalmalsawma, Official Spokesperson & State Nodal Officer on COVID-19 chuan tun hnaia COVID-19 hri leng dona atana Aizawl Municipal Area Lockdown chhung khan Aizawl Municipal Area huamchhungah sample 13092 test a nih thu leh COVID-19 hri kai 578 hmuhchhuah a nih thu a sawi.

Dr. Pachuau Lalmalsawma chuan lockdown chhungin Aizawl Municipal Area huam chhunga positive hmuhchhuah tawh sa atanga contact tracing tih ngai leh sample test ngai te ngawrh tak a thawh a nih thu sawiin, RT-PCR test atan sample lak hi 11,271 lai niin, Rapid Antigen hmang a test nei zawng zawng zawng hi 1821 a tling hial a ni, a ti a. Hemi hun chhung hian Aizawl khawpuiah COVID-19 positive 578 an ni a, Sample test atanga positive hmuhchhuah hi za zel ah 4.41% lai a ni pha a, India ram pum leh State hrang hrang te nen chhutin hemi hun chhunga Aizawl Municipal Area a positive rate hi a sang hle tih a sawi.

Integrated Disease Surveillance Programme (IDSP). H&FW Department-in data chi hrang hrang kimchang taka an lakkhawm reng thu sawiin, an bihchhianna atanga lo lang chu Lockdown chhunga natna hmuhchhuah zawng zawng atangin natna lang chhuak (Symptomatic) hi 35.12 % an ni a, natna lang chhuak lo (Asymptomatic) 64.88% an ni thung a, lockdown chhung a positive case hmuhchhuah aingah hian Contact tracing atanga hrikai hmuhchhuah hi an tam fal hle a, Hri an kaina chin hriat loh ‘Isolated Cases’ ho zingah Symptom nei hi 66.67% lai an tling bawk tih a sawi. Hemi hun chhung hian frontline worker hri kai mi 16 hmuhchhuah niin an zinga za 75% te hi Symptomatic an ni a, 25 % te hi Asymptomatic an ni thung a ni.

Kum bithliah hrang hrang ang zawnga chhutin Lockdown hun chhung hian kum 11 - kum 20 inkar ah hri kai thar an tam ber a, hrikai zawng zawng atanga chhutin 100 a 27.50 % lai an tling a, a tam ber chu school naupang an ni. Lockdown chhunga hrikai hmuh chhuah zingah Kum 1  hnuai lam 4 an awm a. Kum upa lam COVID-19 kai thar hi 42 lai an awm bawk. Hri kai zinga naupang ber hi nausen thlahnih (2) mi niin, a upa ber hi kum 93 mi  a ni bawk.

Lockdown chhunga hri kai hmuhchuah ah hian local transmission kan tih mai, khawtuala kai hi a tam tawh hle a, 100 zelah 82 % lai a tling a; mipui te kan fimkhur a hun tak zet tawh a ni tih a sawi.

Lockdown chhunga AMC area- a COVID-19 Positive hmuhchhuah thar 578 zinga  258 chu mipa niin hmeichhia hi 320 an ni a. Mipa Positive hi 100 zelah 44.64% Hmeichhia Positive hi  za ah 55.36 (%) an ni.

Lockdown chhungin AMC huamchhung ah hian Local Council (veng) 83 awm zinga veng 57 ah hemi hri kai thar hmuh an ni a, Dinthar, Zemabawk, Salem veng ah hrikai thar hmuhchhuah thar an tam zual tih sawiin, Dr. Pachuau Lalmalsawma chuan Aizawl khawpuiah Lockdown hi kalpui ni ta lo se Aizawl a hri kaite hian Mizoram hmun hrang hrangah mi engzat chiah nge an kai darh ang tih hi chhut tham a tling a ni a ti a. Lockdown hi hman reng  theih a ni lova; a rem lohna chhan tam tak a awm a ni a ti a. Sawrkar thahnemngaihna tawmpuiin tlawmngai pawl leh kohhranten theihtawp chhuahin programme pawimawh tak takte pawh an thulh hial a,   School hawn pawh tih tawp hial a nih laiin mimal tinte kan mawhphurhna a kan chian a ngai a ni, a ti a.  Kan fimkhur loh chuan kan state-ah COVID-19 hi a hluar zel dawn a. ICU lut pung zelin kan thenawm state ten  thihna  nasa taka an hmachhawn mek ang hi kan ta a ni ve thei reng a, hemi pumpelh tur hian sawrkarin thu zawm tur a sawite uluk taka zawm turin mipuite a ngen nawn leh a, a bik takin sample test tura laksakte chu an test result a chhuah hma chuan strict taka home quarantine a awm vek turin a chah bawk a ni.