No.6529/2020-2021

Lawngtlai, Sahmulphah thla ni 13, 2020: Vawiin khan Lai Autonomous District Council (LADC) hnuaia Member of District Council (MDC) Inthlanpui, 2020 lo awm tur atana Lawngtlai District Level Standing Committee chu District Election Officer, he inthlan atana Returning Officer (RO) ni bawk Dr Andrew H. Vanlaldika hovin Lawngtlai DC Conference Hall-ah an thu khawm a. Inthlan chungchanga hriat tur pawimawh hrang hrang inhrilhfiah niin, inthlan felfai leh muanawm tak a awm theih nana hma lak dan tur te sawi ho a ni.

He hunah hian 1-13 constituency-a Assistant RO Pu K. Vanlalthiana, 14-25 constituency-a Asst RO Pi Marilyn Rualzakhumthangi, Lawngtlai Addl SP Pu C. Lalruatkima, Nodal Officer (MCC/Postal Ballot) Pu V. Lalruatliana leh Election Officer Pu Lalneihthanga Colney te bakah, Lawngtlai District chhunga political party hrang hrang, tlawmngai pawl leh kohhran ai awhte an tel. He hunah hian LADC Inthlanpui 2020 neih tura thil pawimawh hrang hrang tih hun duan lawk te, model code of conduct chungchanga political party-te hriat tur pawimawh te, inthlan senso atana sum hman (election expenditure) chungchang te, inthlan chuh tum (candidate)-te tana hriat tur pawimawh te, polling station chungchang leh COVID-19 hri leng avanga fimkhurna tura State Election Commission (SEC)-in ruahmanna leh inkhuahkhirhna a siam hrang hrangte inhrilhfiah a ni a. Zawhna leh chhanna leh sawi hona hun hman a ni bawk.

LADC MDC Inthlanpui, 2020 neih tur hi SEC chuan November ni 9, 2020 khan puangin, inthlan hi December ni 4, 2020 zing dar 7 atanga tlai dar 4 inkar chhunga neih turin ruahman a ni a. Inthlan puan ni atang hian LADC huam chhungah model code of conduct pawh hman nghal a ni.

LADC-ah hian MDC constituency 25 awmin, polling station 111 a awm a. Vote nei hmeichhia 26104 leh mipa 25352, an vaiin mi 51456 an awm.