1681/2023-2024

Mamit 28th August, 2023 : Vawiin khan Dr. R. Lalthangliana, Health & Family Welfare, Higher & Technical Education, Commerce & Industries Department changtu Minister chuan W. Phaileng-ah Market Building lungphum a phum.

Dr. R. Lalthangliana, Commerce & Industries Minister chuan mizorama a hmasa ber tur atana NEC sum hmanga market building tha tak sak a ni tur chu a lawmawm hle a, bial mipuite in vannei hle a ni a ti. Market Building thuamthat zui zelna tur pawh NEC lam dawr chhunzawm a nih thu a sawi. Bangladesh nena insumdawn tawnna tur Silsury Border Trade chu hmalak chhunzawm zel niin peihfel trep a ni tawh a. He insumdawn tawnna atana kawng pawimawh Silsury to Pukzing kawng pawh lo thuamthat lawk tum a ni a ti, Minister chuan Mizoram sawrkar hnuaiah kan sawifo angin, covid hrileng mai nilo harsatna hrang hrang Vawkhri, Raltlan leh a dangte hmachhawn tur tam tak kan tawh avangin hmasawnna hnathawh a harsa em em a, chutichunga Dampa bialchhunga hmasawnna hrang hrangte hmuh hmaihlo turin bial mipuite chah bawk.

Minister chuan Marpara PHC Building sak thar mek chu hawn mai tura peihfel a ni tawh thu sawiin, Health & Family Welfare Department hnuaiah pawh hmasawnna tam tak hmuh a ni a, Doctor indaihlohna nasa tak awm thin chu, ZMC atanga doctor zirchhuak internship bei mek 70 atanga 80 dawn an awm ta a, Doctor indaihlohna a phuhruk a beisei thu a sawi. Kumin March thla khan Mizoram chhunga Sub-Centre zawng zawng - 375 chu Health & Welness centre-a hlankai vek a ni a, PHC Centre pawh upgrade vek a nih thu a sawi.

Pu Lalrintluanga Sailo, Deputy Chief Whip leh Dampa Bialtu MLA ni bawk, pawhin thu sawiin ramin harsatna tam tak a tawh avangin duhthusamin hna thawk theilo mah ila, kan Sorkar leh mipui zarah hmasawnna duhawm tak tak bialin kan hmu thin chu a lawmawm hle a, W Phaileng leh a chhehvel khuate tâna eizawnna kawnga tangkai tak ni tur W Phaileng Market Building thar kan nei mai tur hi lawmawm takzet a ni tiin, hma min laksaktu kan Minister Dr. R. Lalthangliana leh Department officials-te chungah lawmthu a sawi a. W. Phaileng khua mai bakah a chhehvel mipuite pawhin market buiding thar chu tangkai taka an hman a duhsak thu sawiin, bialchhunga sawrkar hmalakna leh hmachhawp hrang hrangte a tarlang bawk.

Market Building New W. Phaileng hi North Eastern Council ( NEC) sum hmangin Rs 278.25 lakhs senga sak tur a ni a. Dt 22.08.2023 a sak tan tur niin Dt. 22.08.2025 -ah sak zawh tum a ni. A zauzawng hi 857.57 sqm. a ni ang a. A Building hi mizopa chhiara chhawng thum, Ground Floor, First Floor leh second floor-a sak tura ruahman a ni bawk.

Market Building hawnna New W. Phaileng Bazar Shed-a neih hi Pi Lalsangpuii, Addl. Director, Commerce & Industries Department chuan kaihruaia, Pu Ronald Lalchhuanawma, Deputy Director, Trade & Commerce chuan lawmthusawina a nei bawk.

Dr. R. Lalthangliana Higher & Technical Education Minister hian W. Phaileng Higher Secondary School tlawh bawkin 2-Dampa Constituency huam chhunga result nei tha thin tak, W.Phaileng Higher Secondary School-in Adhoc Grant-In-Aid a hlankai an lo dilna chu theihtawpchhuaha, hmalak tum a nih thu a sawi a, result duhawm tak hmuh ngei beisei a ni a ti. W. Phaileng Higher Secondary School-ah hian W. Phaileng khua bakah khaw chhehvel khaw 14 atangin mi 129 zirlai an awm mek a ni.

Health & Family Welfare Minister hian W. Phaileng PHC a tlawh bawk.

Dr.R. Lalthangliana, Minister hi Commerce & Industries Department hotutute, Health & Family Welfare Department hotute bakah Sawrkar Officials thenkhat te leh Khawtlang hruaitute'n an tawiawm a ni.