1682/2023-2024

Aizawl the 28th August, 2023 : MP (Lok Sabha) Pu C. Lalrosanga hovin vawiin khan Telecom Advisory Committee chu kumina a hmasa ber atan Aizawl ah an thukhawm a. MP (Lok Sabha), he committee chairman ni bawk chuan BSNL, Mizoram hotute hmasawnna thu a sawipui a. Mipui rawngbawltu an nih angin vantlang harsatna leh mamawhte thlira an hmalaknate mipui hriattir zel turin a fuih a ni.

Pu C. Lalrosanga chuan BSNL in hotu thar Principal General Manager Pu Arumaya Dakua an nei chu lawmawm a tih thu sawiin, BSNL in  Mizoram puma inbiakpawhna tiṭha tura hma an lak mekte leh ruahmanna an neihte chu tipuitling thuai se a duh thu a sawi a. Mizorama 4G service pekna tur hma lak mekte chu tun sawrkar kum ngeia tipuitling turin a fuih a. Nakin zel atana 5G hmanga inbiakpawhna neih tuma hma la tura fuihin, sawrkar laipui lamah a ṭul dan anga hmalakpui a inhuam thu a sawi bawk.

BSNL hotute chuan Mizoramah telephone exchange 37 leh Landline connection 5747 an la neih thu an sawi a. Broadband connection hman lai 2094 an neih bakah mobile connection 2,60,814 (Nuai hnih, sing ruk zariat sawm pali) an pek mek thu an sawi bawk. BSNL hian motor kawngpui, National Highway zaa 81 leh State Highway zaa 54 mobile in an huampha a. 4G hmanna tur atan district 11 ah Tower 60 bun an tum mek bawk a ni tih vawiina TAC ṭhutkhawmnaah chuan an sawi. BSNL hian fibre hmangin district pali ah FTTH connection 6036 an pechhuak mek a, khawl leh hmanraw thar hmanga pekbelh zel an tum bawk a ni.

MP (Lok Sabha) chuan an hnathawhna kawng hranga harsatna an tawhte sutkian chungchangah BSNL hotute chu Mizoram leh sawrkar laipui lama thuneitute hnena thlensak a tum thu a hrilh a. Mizoram khaw hrang hranga hma an lak mek leh hmachhawp chi hrang hrang an neihte chu mipui hriattir tam tur leh  state dang aṭanga hotu leh hnathawktu Mizorama rawn thawkte chu theihtawp chhuah vek turin a fuih a ni.

Vawiina TAC meeting ah hian committee member a ruat Pu HC Vanlalruata, Pu H.Vanlalrawna leh Pu JC Zomuanthanga te an tel a ni.