3859/2022-2023

Aizawl, the 16th March : Dr. R. Lalthangliana, Health & Family Welfare Minister chuan vawiin khan Assembly Conference Hall, Assembly House Annexe a Former Legislators Association of Mizoram(FLAM) General Body Meeting a hmanpui. Inkhawm hi Prof. J.V. Hluna, Vice President, FLAM in a kaihruai a; General Body Meeting thupui chu - ‘Ramngaw, Nungcha leh Tuihna humhalh’ a ni.

Dr. R. Lalthangliana chuan FLAM in party bil sawi lova luangrual taka an thawk ho thin hi a lawmawm a ni tiin, Vawiina FLAM thupui an thlan hi tunlai khawvel in a buaipui mek leh kan ram ngei pawhin a mamawh em em a ni a, a hlawhtlin theih nan theihtawpa hmala chhunzawm zel turin a chah a, eng ang a ram ropui pawh ni se, tuihna tha an neih loh chuan ram nuam a ni thei lova, chuvang chuan vawiina kan thupui ang hian tuihna tha kan neih theihna tura kan tan tlan a ngai a ni a ti a. Minister chuan kan dam chhung hian midang tan kan luanchhuah hi a pawimawh a, vawiina dam lai te hian kan ram leh thangthar te tan rotling thil hnutchhiah theuh i tum ang u, a ti.

Vawiin inkhawm hi tumhnih a then niin, inkhawm tum khatnaah hian Pu Liansuama President in Presidential Address a nei a. Tunhnaia an member pui chatuan ram pan ta - Pi K. Thanpari w/o Pu C. Sangzuala, Kum 80, Pu Lalhmingthanga kum 82, Pu R. Khawpuithanga Kum 81, leh Pu Lalrinmawia kum 76 te sunna hun an hmang a. Pu Rochhunga Ralte, Treasurer leh Pu T.C. Pachhunga Gen. Secretary ten report pekna hun an hmang. Er. Rothanga Director, SIPMIU in thupui - ‘Tuihna humhalh’ a sawi a. Inkhawm tumhnihna Chawhnu Session hi Pu Liansuama President in a kaihruai a, Prof. Lalnuntluanga, Department of Environmental Science, MZU in ‘Ramngaw leh Nungcha humhalh’ tih thupui hmangin thu a sawi bawk a.

FLAM hi 1994 khan din a ni a, Mizoram Assembly kum 50 chhung hian MLA 232 an awm tawh a, member 95 chatuan ram pan an awm tawh bawk a ni. FLAM hian kan rama inthlanna thianghlim leh senso tlem zawk kan neih theih nan thehnem ngai takin hma an la mek a, hemi atan hian Kohhran, Tlawmngai Pawl leh Party hrang hrang te nen thawkho a ni.