Vawiin hian Government Serchhip College Campus a, Administrative Building leh Academic Building inkar inkalpawhna tur Fly Over Pedestrian Bridge chu Higher & Technical Minister Dr. R. Lalthangliana’n a hawng.

A hawnna inkhawm tawi, College Smart Classroom a buatsaihah thusawiin Dr. R Lalthangliana chuan, Government Serchhip College in an mamawh em em Fly Over Pedestrian Bridge an nei ta chu a lawmpui thu a sawi a. Science Block Building tur RUSA sum hmanga sak mek te pawh hun reiloteah peih thuai a nih theih a beisei thu te hrilhin, Campus chhunga vantlang kawngpui kaltlang chu nakin zelah singsak deuh a tul a rin thu te a sawi a ni. Minister hian Laboratory leh Library an mamawhna te pawh a theih anga umzui dan an zawn tur thu te; zirtirtu, indaihlohna leh hrisel lohna vanga han insiksawi ngai awm thei thilah Department thuneitute hrilhhriat zung zung thin ni se tha a tih thu hrilhin, sawrkar chuan college te a ngai pawimawh em em a ni, a ti.

Minister hian a enkawl Department dangte hmalakna thenkhat tarlangin, Mizorama kan Sub Centre te chu Health And Wellness Centre a thlaka, B.Sc Nursing chinin thutchilh tir leh building thar te sa a tun aia changtlung zawka hmanrua leh bungruate pawh dah vek tum an nih thusawiin, chutianga hmalak nan chuan World Bank nen indawrna neih mek a nih thu a tarlang a. Commerce & Industries lamah pawh ruahmanna engemawzat ruahman mek a nih thu a tarlang a ni.

He hunah hian Er. Lalduhzuala, SDO, PWD chuan technical report a pe a, Bridge hi CM Development Priority Fund sum, Rs. 43 Lakh atanga sak a ni a, a sei zawng hi meter 31 niin meter 2.5 a zau a ni a, ruah laka hul tura rangva chung nei, Ceiling thlap a ni. He leihlawn hian College Office Building leh Classroom inkar inkalpawh nana Khawtetlang panna kawngpui tan tlanga thui tak kal ngai thin kha tawitein a chhuah ta a ni. Hna hi 2.4.2019 ah tanin 27.9.2019 ah zawh fel hman  a ni.

A hawnna inkhawm hi Pu PC Lalremsiama, Principal GSC in a kaihruaia, Serchhip bawrhsap Pi Sangchhin Chinzah, Government Serchhip College thawktute, Minister rawn tawiawmtu Higher & Technical, Heath Department, Commerce & Industries official pawimawh leh Serchhip a official pawimawh ten an tawiawm a ni.

Dr. R. Lalthangliana hian Serchhip a pan pah hian Baktawng khua leh Chhingchhip khuate a rawn tlawh nghal a, Baktawngah hian Sub Centre bakah Carpentry Cluster te, Aluminum Cluster te, Aloe Vera Sahbawn siamna Cluster te, Charcoal Briquette tih changtlun nana hmalak mek te enpuiin harsatna an lo sawi te a ngaihthlak sak a. Baktawng khuaa Industry hmalakna hrang hrang te chu SEDP atanga tihchangtluna tihlen a nih theih nan Project lian tak thehluh a nih thute, Central lam pawhin an pawmpui tawh thute a hrilh  a ni.

Baktawng a tlawh hnu hian Chhingchhip a MIFCO hnuaia Fruit Juice Concentration Plant tlawh lehin an khawl hrang hrang te a enpui a, mumal zawk leh tangkai zawka hman a nih theih dan tur te thawktute pawh a sawipui nghal a ni. Chhingchhip Sub Centre a tlawh nghal bawk. Baktawng leh Chhingchhip te a tlawh hian bialtu MLA Er. Lalrinawma, Deputy Speaker ni bawk chuan Minister hi a tawiawm a ni.

Dr. R. Lalthangliana’n Serchhip College Fly Over Bridge a hawn zawh hian Serchhip District Industries Centre a tlawh leh a chumi hnuah Thenzawl pan lehin Thenzawla puantahtute leh an hmunhma te tlawhin, puantahtute nena inkawmna hun te a nei leh bawk a ni.

Minister hi  Pu C. Ramhluna, Vice Chairman, Industrial Development Board, Pu C. Lalrammawia, Chairman, ZOHANCO, Dr C. Lalzepuii, Jt. DIrector, Health & Family Welfare, Pu Ramhmangaiha Ralte, Jt. Director, Higher & Technical, Pu Zosangliana, Manager, MIFCO leh official pawimawh dangten an rawn tawiawm a ni.