No.3660/2021-2022

Aizawl, the 14th January 2022 : Health Minister Dr. R. Lalthangliana, Commerce & Industries changtu ni bawk chuan vawiin khan Mizoram Khadi & Village Industries Board (MKVIB) hmunhma Zemabawk a awm Multi Disciplinary Training Centre ah thalai ten eizawnna kawng an neih theihna trade hrang hrang atana training buatsaih chu a hawng a. Commerce & Industries Development Board Vice Chairman Pu K. Laldawngliana, MLA pawh training hawn naah a tel a ni.

Dr. R. Lalthangliana chuan Central Sawrkar in commerce leh industries hi eizawnna kawng hrang hrang siamtu leh eizawnna inghahna tam ber anih angin, a dah pawimawh viau a, Budget ah pawh hemi sector atana hian sum ruahman a tam a. Hripuiin mipuite eizawnna a tihchhiat leh a nghawng nasat avangin post covid economic package pawh cheng vaibelchhia nuai khat lai a ruahman a. Mizoramah pawh mahnia eizawnna nei mi tam takin hripui vangin an sum lakluh kawngah harsatna an tawk a, hetiang chhungkaw 50000 ten tanpuina an dawn theih nan vaibelchhe 250 project  Post Covid Economic Revival Project ruahman niin Sawrkar Laipuiah dil mek a ni, a ti.

PMEGP leh KVI loan lak kawngah Bank kalphung leh inkaihhruaina a khirh avangin leh document tam tak phut anih thin avangin loan lak harsat dan chu a hriat thu sawiin Minister chuan heng hi awlsam zawka tih dan kawng zawn nan Bank te nena hemi kawnga kan thawh tlanna hi her rem anih theih nan Mizorama Bank hotute nen pawh tum hnih lai tun hnaiah meeting kan nei tawh a. Sum awmsa leh ruahman ni si mahse sum hman theih loh hi a hman dan kawng zawn a tul thu sawiin nikumah Hmarchhak MSME Minister te meeting ah pawh he harsatna awm thin sutkian nan an kalphung neihsa te chu tlema ngaihnathiamna siam turin Sawrkar Laipui Minister pawh a ngen thu Dr R. Lalthangliana chuan a sawi a.

Training tan tur thalai te chu tih tak takna nen training chhuaka, eizawnna kawng  nei ngei ngei tura hlawhtlin duhna rilru nei turin a fuih a, An thil zir chhuah atangin eizawnna kawng ngelnghet an neih ngei a dusak tiin a sawi bawk a ni.

Pu K. Laldawngliana, MLA pawhin thu sawiin an thil tih reng rengah beidawnna nilovin beiseina neia, hlawhtlin leh dinchhuah ngeina rilru nei turin training tur thalai te chu a chah a ni. Training hawnna inkhawm tawite hi Pu Lalthanliana, Ex MLA, Chairman, Mizoram KVI Board in kaihruaiin Pu F. Lalrinenga, CEO, Mizoram KVI Board hnen atangin training kalpui dan te ngaihthlak a ni.

Tum tum training ah hian thalai 82 in eizawnna kawng ni thei Trade hrang hrang 13 ah thla 2 atanga thla 6 course an zir dawn a. Hetiang training hi MKVIB in KVIC tanpuina in kum khata tum 4 an buatsaih thin a. A din tirh 1987 atangin MKVIB kaltlangin thalai 1000 chuangin course hrang hrang 13 te zirchhuakin eizawnna kawng an nei mek a ni.

Attachment

  • Loading attachment...