No.3661/2021-2022

Aizawl, the 14th January 2022: Vawiin chawhma khan Conference Hall, Directorate of Transport-ah Transport Minister Pu TJ. Lalnuntluanga hovin Transport Department officer te leh staff te chuan kumina an hnathawhna leh hmalak zel na atan  inhlantharna  hun an nei.

He hunah hian Transport Minister chuan fuihna thu sawiin mipui rawngbawltu department an nih anga tan la thar leh turin Transport Department a thawktute a sawm a.  Hmalakna pawimawh zual deuh te sawiin mipui te’n office dawr kher loa motor documents leh driving licence te an tih fel theihna tura Online Payment buaipui mek pawh hman theih a nih thuai nan chak zawka thawk turin a khawihtute a fuih a. Driving License pek chhuah chungchangah fimkhur zual tur leh, DTO office tinah counseling uluk taka kalpui turin a chah bawk a ni. 

Thawktute inpekna a zarah Transport Department in hmasawnna hrang hrang a hmuh thu a sawi a. Tun hnaiah Khawthlangtuipui – Tuichawng luia Lawng service tir tura sawrkarin ruahmanna(DPR) a siam pawh Central Sawrkar chuan a pawm fel tawh a. First phase kalpuina tur sum pawh Central lamin sanction an approve tawh thu a sawi bawk. Mizoram leh Tripura Sorkar pawhin Zofate intlawh pawh theihna atan Reciprocal Agreement an ziak fel chu lawmawm a tih thu a sawi a. Manipur Sorkar hnenah pawh Reciprocal Agreement thawn tawh niin, approval hmuh vat a in beisei thu a sawi a, MST Bus pawh Churachandpur lamah te service tir vat tum a nih thu te a sawi a ni.

Transport Department officer te leh staff te infuihna hun hi Pu KT. Beicho, Commissioner & Secretary, Transport chuan a kaihruai a. He hunah hian Er. R. Lalrammawia, Director of Transport chuan Department hnathawh chungchang a hmasawnna leh hmalak mek te sawina hun a hmang a. Director report pek dan chuan “Ease of Doing Business” ah Best Performed Department atan Transport Department chu puan a nih thu leh 100% Achievement on Ease of Doing Business Reforms an neih thu a tarlang a ni.