260\/2023-2024

Champhai, the 28th April, 2023: NABARD (RIDF-XXV) atanga sum hmuh cheng nuai 246.94 senga sak, Farkawn Primary Health Centre Building thar chu vawiin chawhnu dar 3:30 khan Health Minister Dr. R. Lalthangliana'n a hawng. Minister hi East Tuipui bialtu MLA Pu Ramthanmawia, Vice Chairman, Bamboo Link Road Board, H&FW Department atangin Dr. PC Lalramliana, Principal Director leh Department hotu dangte'n an tawiawm a ni.

Farkawn PHC tualzawla hun hmanah Khuallian Dr. R. Lalthangliana chuan Farkawn khua leh a chhehvelte tana tangkai tak tur PHC Building thar tha tak hawn a ni chu lawmawm a tih thu sawiin, hmanrua leh mamawh dangte pawh ngaihtuah zel tum a ni, a ti a. Din a nih atanga a vawikhat nan Sesih PHC ah Doctor dah a nih thu leh mumal taka kalpui a nih thu sawiin, hun reiloteah Sesih PHC Building pawh sak tum a ni, a ti a. Hripui leng avanga hun engemawchen harsatna namenlo a thlen thu leh, dam khawchhuak tura sum leh pai engemawzah Sawrkarin a sen thu sawiin, hripui leng avangin health department hnuaia indaihlohna phuhruk nana hnalak tur tam tak tih fel vek tawh pawh thulh rih a nih thu a sawi a; department dangahte pawh harsatna a thlen phah bawk a ni, a ti a. Covid-19 hripui leng chuan ram rethei ber atanga changkang ber thlengin nasa takin a nghawng a ni, a ti a. Covid mai bakah Vawk pul hri leng, lirnghing, ramri buai leh thenawm rambuai avanga raltlan chhawmdawl ngaite buaipui a tul tel thu sawiin, harsatna tawh laia lungrual taka mimal, khawtlang hruaitu, NGO, Kohhran leh Sawrkar hmalakna chhuanawm a tih thu a sawi bawk.

Health Minister chuan JICA nena tangdunin Zemabawkah cheng nuai 70,000 senna tur Cancer Superspeciality Hospital din tum a nih thu leh, kum 2028 ah zawhfel hman beisei a nih thu a sawi a. Sawrkarin mipuite hriselna ngai pawimawhin theihtawp a chhuah thu tarlangin, Health Sub-Centre te Health & Wellness Centre-ah hlankai a ni a, Sub-Centre awmlohna khua 235 ah Health Clinic dah a ni a, hmanraw mamawhte dah vek tum a ni, a ti bawk a. Commerce & Industries Minister ni bawk chuan Zokhawthar Land Custom Station tihchangtlun nan cheng nuai 1500 senga hmalak mek a nih thu a sawi a. Tunhnaia India rama Border Trade lian tham kalpuina tur hmun 25 thlan chhuah zingah Zokhawthar leh Zorinpui te a tel chu lawmawm a tih thu sawiin, Mizoram tana chhawrnahawm tak tur a ni, a ti bawk.

Dr. R.Lalthangliana chuan Champhai District mipuite chhawr theih turin tunhnaiah Champhai Urban PHC, rikrum thila damlo enkawlna Trauma Centre, RT-PCR Laboratory leh naupang ICU te hawn a nih thu sawiin, natna khirhkhan bikte uluk taka enkawlna Damdawiin, khum 50 awmna tur Critical Care Block, cheng nuai 2000 senga sak tum a nih thu a sawi a; hei hian Hospital Building mai nilo hmanraw tha leh changtlung zawk a kengtel dawn a ni, a ti a. Health Department hnuaia thawktute chu hmangaihna leh lainatna nena anmahni pantu damlote dawngsawng thin tur leh, Damdawiinte chu damna leh thlamuanna an hmuh theihna hmun atana chantir theuh tum turin a chah a ni.

Khualzahawm Bamboo Link Road Board Vice Chairman Pu Ramthanmawia chuan nikhat thil thua a bial chhunga Damdawiin building thar tha tak tak pahnih hawn a ni chu ni chhinchhiah tlak tak leh, malsawmna ni a nih thu a sawi a. Hriselna kawnga mipui mamawh chhawpchhuah kawnga Health Minister leh Department hotute hmalaknaah lawmthu a sawi bawk a. East Tuipui bial chhunga Health Sub-Centre awm lohna khua pangaahte Health Clinic hawn thar a nih thu a sawi a. Article 275 hnuaiah PHC Building hawn thar hrulah hmalakna dang kalpui mek a nih thu leh, PHC ram chhunga Isolation Ward siam mek chu hawn theih thuai beisei a nih thu a sawi a. Damdawiin hmunhma tha tak chu nakin zela chei theih tur tinzawna ngaihtuahna sen a tul a ni, a ti a. Thawktute chu anmahni beiseia pantute hmangaih taka dawngsawng a, damlote enkawl hna chu rawngbawlna anga ngaia thahnemngai taka hlenchhuah tum thin turin a sawm a ni.

He hun hi Dr. Vanlalsawma, Director of Health Services chuan kaihruaiin Rev. RJ Lalnunpuia'n hunserh a hmang a. Pu Vanlaltlana Zote, PS to Health Minister-in inhmelhriattirna hun a hmang a. Er. Lalfakzuala, Sr. Executive Engineer, H&FW Department-in technical report a pe a. Dr. Eric Zomawia, Mission Director, National Health Mission (NHM) in hriselna kawnga department hmalaknate a sawifiah a. Pu Lalhmingthanga, Republic Veng leh Farkawn VCP Pu C.Lalramliana te hnen atangin thusawi ngaihthlak a ni bawk a. Dr. P.C Lalhmingliana, CMO Champhaiin lawmthu sawiin hun hman a khar a ni.

Farkawn PHC Building thar hi NABARD (RIDF-XXV) sum cheng nuai 246.94 senga sak niin, Contractor hi Excell Consultancy Services, Aizawl a ni a. Hna hi September ni 8, 2020 ah tan niin, April ni 25, 2023 ah zawhfel a ni. RCC framed structure a ni a, zopa chhiara chhawng khat niin, square metre 514 a zau ram a thut a ni.

PHC Building hawn takah hian component hrang hrang; Casualty, X-Ray room, Pharmacy, Laboratory, Minor OT, Toilet Block, Induction room, Male and female Ward, Consultation room, Office, Store room, Labour room, Nursing station, Isolation room, Dirty utility room, Kitchen leh Health supervisor room-te a awm a ni.