1939/2022-2023
Aizawl 15th September 2022: Vawiin khan Minister Dr R.Lalthangliana chuan 26th Mizoram State Wushu Championship 2022 a hawng. Mizoram pum huap championship hi Hawla Indoor Stadium, Aizawlah vawiin atangin khelh tan a ni dawn a ni.

Health & Family Welfare, Commerce & Industries leh Higher & Technical Education changtu Minister Dr.R.Lalthangliana chuan thalai kalkhawm te fuihin Mizote hi khawi hmunah pawh eng kawngah pawh kan duai lo tih hre thar turin a chah. Eng kawng pawh zawh se, hlawhtling tur chuan rilru paukhauh a tul tih sawiin “Kan rilruin khawvel hi kan ngam tur a ni”, a ti a. A bik takin sports ah Mizo thalaite talent neih thatzia sawiin sports zirna institution lian tham tak tak te nei lo mahila a tui mite thahnemngaihna avangin sang tak takah Mizo infiammite an invawrh a, India leh khawvel hriatah an invawrh chho chak hle a, he talent tha tak an neih hi Pathianin Mizote malsawmna a pek a ni, Minister chuan a ti.

Dr R.Lalthangliana chuan eng kawngah pawh hlawhtlinna nei tur chuan daihrei a pawimawh, a ti a. Mizo zingah talent nei tha, langsar leh thleng sang lo awm tawh thenkhat te an boruak a dai leh mai thin a, chuvangin hlawhtlinna tluantling nei tur chuan daihrei leh tlo a pawimawh tih hre turin kal khawm te a fuih a ni. Wushu Championship a tel tur te chu kum lamah pawh la naupang tak tak, hmakhaw eng tak nei an ni, Minister chuan a ti a. Coach tha tak an pawimawh em em rualin a pawimawh ber zawk chu anmahni mimal theuh kha an ni tih hriaa tumruhna nen, mahni inthunun thei mi ni turin a fuih a ni.

COVID vanga a khaihlak reng hnuah kumin hian Mizoram State Wushu Championship vawi 26-na hi buatsaih a ni ta a. Mizoram District hrang hrang atangin club 30 an tel a, player 120 an inziaklut a ni. Kumin October ni 27-a National Games lo awm turah Mizoram Wushu Association chu tel thei tura thlan an ni a, tun tum championship hawn tak hi he National Games a Mizoram aiawha khel thei tura tehfung pawimawh a ni dawn a ni. North East Olympic Games kumin October thla veka neih tura tel turin Mizoram Wushu Association chu a inbuatsaih mek bawk.

Mizoram Wushu Association hi kum 1992 khan Pu Patrick Paul Hauhnar (L) hova din a ni a. International, national leh north east ah te medal thahnem tak an la tawh a ni. He Association hian medal lak ringawt piah lamah player te nun kawng dik zawh a ngaih pawimawh a, ram leh hnam tana mi tangkai an nih theih nan an enkawl a. “Discipline tha a hmasa tur a ni a, medal in a zui ang” tiin Mizoram Wushu Association General Secretary Pu Lalrinliana chuan vawiin hawnna inkhawmah hian a sawi a ni.

Vawiin programme hi Mizoram Wushu Association President Pu Lalhmingmawia Sailo chuan a kaihruai a. An pawl Administrative Secretary Pu Lalengmawia Colney chuan lawmthu sawiin hun hnung a khar a ni.



Attachment

  • Loading attachment...