1940/2022-2023
Lunglei the 15th September, 2022 - Vawiin khan Lunglei Town Sanitation Task Force chu an Chairman Lunglei DC Pu Kulothungan A kaihhruaiin Lunglei DC Conference Hall-ah an thukhawm.

Meeting-ah hian Mizoram Cleanliness Competition 2022 leh Swachh Survekshan 2023 atana inpuahchah dan tur leh Lunglei District-a Cleanliness Week 2022 hman dan tur te sawiho a ni.

Lunglei Town Sanitation Task Force thukhawm hian Swachh Bharat Mission (Urban) atana Lunglei District Brand Ambassador-ah Pi Lalenkawli Pautu an ruat bawk a ni.

Chairman Lunglei DC Pu Kulothungan A chuan Lunglei chu faina kawnga Mizoram District te zinga hma hruaitu leh thawk tha anih zel theihnan member-te thahnemngai taka mahni zawn theuha hma la chhunzawm turin a chah a ni.

Mizoram Cleanliness Competition 2022 atan Online Assessment Phase 1 chu August thla ah zawhfel tawh niin tun dinhmunah Online Assessment Phase 2 kalpui leh mek a ni a. November ni 1 atanga December ni 31 chhung hian a hmuna endik (Offline Assessment) neih tur niin khawpui chhung fai leh chei mawi, bawlhhlawh sawngbawl dan, pawn lera inthiar awm leh awmloh, Single Use Plastic hman tlem, faina kawnga mipui mimir inzirtirna leh faina kawihhnawih thil dang te endik a ni dawn a ni. Hemi kawnga inpuahchah dan tur hrang hrangte sawiho niin mawhphurna te insem a ni.

Sawrkar laipui Ministry of Housing & Urban Affairs buatsaih India pum hap faina intihsiakna Indian Swachhata League ah Lunglei District pawh tel ve in hmalak mek a nih thu meeting ah hian tarlan a ni a. Hemi pual hian September ni 17 (Inrinni) ah Children’s Park-ah flag off program neih tur niin Children’s Park leh Pukpui Centenary te thenfai hnathlang neih a ni dawn a ni. Lunglei District team hming hi Lunglei Legion Team tih a phuah a ni.

Lunglei District-a Cleanliness Week 2022 (2nd – 9th October, 2022) hman dan tur pawh sawiho niin a hawnna chu State lelvel atanga program an rawn bituk anga kalpui leh tur a ni a. Kum dang Cleanliness Week angin Category hrang hrangah fai inelna buatsaih leh tur niin a endik tu tur te pawh ruat fel nghal an ni.

S No

Category

Enfiah Tu

1

Sawrkar Office

Sub Hqrs YMA, Lunglei

2

Bazar (Market)

MJA Lunglei

3

High School leh a chung lam

Samagra Shiksha

4

Hotel

MHIP

5

Hospital

MUP

6

Veng (Commercial Category leh Non Commercial Category)

 Clean Lunglei

7

Lirthei siamna workshop (4 wheeler category leh 2 wheeler category)

 

Joint VC Association

Attachment

  • Loading attachment...