1941/2022-2023
Khawzawl, the 15th September, 2022: Swachhata Hi Seva - Faina hi rawngbawlna a ni, tih thupui hmanga faina leh thianghlimna kawnga hmalakna, September ni 15 atanga October ni 2, 2022 chhunga Swachh Bharat Mission- Grameen hnuaia neih tur chu vawiin chawhma dar 11 khan Khawzawl District chhunga kalpui turin Bawrhsap, Pu C.C. Lalchhuangkima, District Water & Sanitation Mission Chairman ni bawk chuan DC Conference Hall-ah a hawng.

He hun Er.Liantluanga Chohte, EE, PHED & Member Secretary, District Water & Sanitation Mission (DWSM) ni bawk kaihhruaiah District Bawrhsap, Pu C.C. Lalchhuangkima chuan District fai ber ni turin tan kan lak tlan a ngai hle a ni, a ti a. Mitin ten tan an lak rualin Sawrkar hmunhma enkawltu Department hrang hrangte pawhin an hmunhmate an enkawl fai a ngai a ni, a ti bawk.

Swachhata Hi Seva kalpui hun chhung hian Khawzawl District thingtlang khuate fai inelna District Water & Sanitation Mission chuan a buatsaih dawn a, endik turin DWSM member-te ruat an ni a. Swachh Bharat Mission- Grameen hnuaiah kum 2017 atang khan Swachhata Hi Seva hi thupui hrang hrang neia hman thin a ni a, Kumin 2022 atana thupui leh hmalakna tura duan tlangpuite chu;

1. Hmuh theiha khawtlang fai siam.
2. Bawlhhlawh a awmna hmun tur nilo a awm avanga natna min thlen theitu tihfai.
3. Bawlhlawh tawih thei leh tawih theilo chhuahna (source) atanga thliar hran inzirtir.
4. Bawlhlawh thliar hrante dahkhawmna tur siam (FFC,MGNREGA etc).
5. Bawlhlawh paih motor lei thei tura khawtlang inbuatsaih.
6. Bawlhhlawh tawih theilo dahkhawm sa lakkhawm/khawnkhawm.
7. Tui tlan hnar leh a chhehvelte uluk lehzuala venhim leh enkawl bakah thing phun uar.
8. Gram Sabha-ah vawikhat hman chi (single use plastic) in harsatna min thlen theih dan inzirtira, hmanglo/hmang tlem tura inzirtir bakah intiamkamna neih.
9. ODF+ ni tura nasa taka tanlak.
10. Inzirtirna thu ziah slogan/wall writing siam te a ni.

Swachhata Hi Seva (SHS) hi thupui thlan bik neiin kum tina neih thin a ni a, kumin bik atan hian, 'Khaw faina tihhmasawn leh bawlhhlawh kum hlun then fai' (remove legacy waste and improve visual cleanliness) tih thupui hmangin India ram pumpuiah September ni 15 atanga October ni 2, 2022 chhung hian neih leh tur a ni a. Thingtlang kilkhawr ber thlenga faina pawimawhzia inzirtira nunpui zel tura hrilhfiahna neihte a huam dawn a ni.