3746/2022-2023

Champhai, the 3rd March, 2023: Vawiin chawhma dar 10:30 khan Zotlang Sports Stadium, Champhaiah District Level Chapchar Kût Organizing Committee buatsaihin 'Zofate Inpumkhatna' tih thupuia hmangin Chapchar Kût 2023 chu ropui taka lawm a ni. He hunah hian Health & Family Welfare Board Vice Chairman Dr. ZR Thiamsanga, Champhai North bialtu MLA chu Kût Pa a ni a, District Bawrhsap Pu James Lalrinchhana chu Kût Thlengtu a ni.

Kût Pa Dr. ZR Thiamsanga chuan Champhai District mipuite Chapchar Kût chibai a buk a. Hrileng avanga kum hnih chhung khaihlak a nih hnuah Chapchar Kût lawm leh a ni thei chu lawmawm a tih thu sawiin, Champhaia Kût hlimawm tak lawm a nih theih nana Sawrkar leh NGO te hmalakna fakawm a tih thu a sawi a. Zofate inpumkhatna tih lantir nana huapzo leh mitin tel theihna Chapchar Kût huaihawt a ni chu lawmawm a tih thu a sawi a. Thenawm ram buai avanga zo hnahthlak raltlan ten hun khirh tak an tawh mek laiin Mizoramin a ngaihsak reng thu sawiin, zohnahthlak unaute thlamuang taka awm turin a chah a. Kût chu hnam chanchin leh chindan atanga lo chhuak leh hnam nunphung pholangtu a nih miau avangin kan thlahthlam thiang lova, Chapchar Kût chuan inpumkhatna leh inpawhtlanna tha zawk a siam thin a ni, a ti bawk.

Chapchar Kût lo chhuah dan, hman dan leh hnam nunphunga nghawng a neih dante tarlangin, hmasang atang tawha ngaihhlut em em Chapchar Kût chu khawtlang huapin uar taka lawm a nih thin thu a sawi a. Kar khat chuang zet te hman a nih thin avangin mipuite a hnukhnaia, inpawhna leh inunauna nasa tak a lo chhuah phah thin a ni, a ti a. Kût ni ah tumah an inla hrang ngai lova, induhsaktawnna hun hlimawm tak an hmang thin a, tumah buaina siam leh hauh ngai an awm ngailo a ni, a ti a. Mi chhia leh tha thliar lova huapzo taka hman thin a nih avangin mipuiten an nghakhlel thin a, hei hian hnam peng hrang hrangte a hnukhnai thin a ni, a ti bawk. Chapchar Kût lawmna chu khawtlang nuna induhkhawplohna leh insiamthat ngaihna laite siam thatna darthlalangah chang se a duh thu sawiin, ram leh hnam inpumkhatna, inlungrualna leh inunauna tha zawk a siam ngei a beisei thu a sawi bawk.

Kût Thlengtu District Bawrhsap Pu James Lalrinchhana chuan Kût hmang tura kalkhawmte lawmna thu a sawi a. Chapchar Kût chu hlimna, inthianthatna leh inpumkhatna ni a nih angin Zofate, khawtlang leh ramah inpumkhatna a thlen ngei a beisei thu a sawi a. District mipuite chu induhsaktawnna hun atana hmang turin a chah nghal bawk.

Chapchar Kût lawmnaah hian Rev. Lalchungnunga Hauhnar-in hunserh a hmang a. Pu R. Lallawmzuala, Secretary, Sub-Hqrs. YMA Champhaiin report a pe a. Chapchar Kût lawmnaah hian Mizo hnam ziarang lang thei hrang hrang; zai, rimawi tum, costume parade, infiamna leh intihhlimna benglut leh hmuhnawm tak takte entira ngaihthlak a ni a. Khawpui thuthmun NGO Branch hrang hrangte bakah Dungtlang MUP, Zomi Cultural Society leh Myanmar atanga zohnahthlak raltlan ten hun an hmang a. Naupang hnam thuama inchei nalh, Kût Lanu leh Kût Val thlan a ni bawk a. Kût puala induhsaktawnna lantir nan Chhawnghnawh hun hman niin, a huhova Chai a ni bawk a. Pu F.Lalrinmuana, Sub-Hqrs. YMA Champhai President-in lawmthu sawina hun a hman zawhah Chapchar Kût Concert hmanga Kût lawmna hun khar a ni.

Attachment

  • Loading attachment...