3745/2022-2023

Khawzawl, the 3rd March, 2023: Zofate Inpumkhatna tih thupui hmangin vawiin chawhma dar 10:30 khan Sub-Hqrs. YMA Field, Zuchhip Veng, Khawzawlah Chapchar Kût 2023 ropui taka lawm a ni. He hunah hian District Bawrhsap Pu C.C. Lalchhuangkima chu Kût Pa a ni a, Sub-Hqrs. YMA Khawzawl President Pu K.Lalnunsanga chu Kût Thlengtu a ni.

Kût Pa Pu C.C. Lalchhuangkima chuan Khawzawl District mipui zawng zawngte Chapchar Kût chibai a buk a. Thupui thlan 'Zofate Inpumkhatna' tih chu thupui pawimawh leh kan ramin a mamawh tak a ni, a ti a. Hnam chak leh hnam ropui ni tur chuan kan tanruala kan inpumkhat hmasak a pawimawh a, kan inpumkhat lova kan inthendarh chuan hnam tlem te, hnam chak lo leh hnam boral tur kan ni mai dawn a ni, a ti. Zofate tih chuan Mizo hnahthlak hnam chi peng tlang hrang hranga chengte a huap vek thu sawiin, kum 1947 April ni 2 a Mizo Union-in Governor General hnena lan thu thlenah chuan Mizo hnam hi chi peng 47 awm angin an tarlang a ni, a ti a. Zofate inpumkhat nan hnam peng hrang hrangte ti unautu leh phuarkhawmtu tha ber hnam tawng tlanglawn inhriatpawhtawn a tul thu leh, hnam bil inenhranna leh chibil inlakhranna do tlat a tul thu a sawi a. Tawng hman tlanglawn leh a tam zawkte hman Duhlian Tawng tlema pai deuh pawh kan hriatthiam a ngai tiin, tumah innuih mai lova inkuah khawm thiam tlan a pawimawh thu a sawi bawk.

Pu C.C. Lalchhuangkima chuan thisena Mizo hnam nihna hre chianga Zofate kan ni tih pawm a pawimawh thu pawh a sawi a. Hausa leh rethei tumah inensan lova inhmangaih leh inngaihsak tawn zela chenho thiamna chu hnam inpumkhat lehzualna atana tangkai tak a ni, a ti a. Mizo hnam incheina leh Zo hnahthlak hnam hrang hrangte incheina chawisan chu Zofate kan inpumkhat lehzualna tur atana pawimawh tak a nih thu a sawi bawk a. Zofate inpumkhatna tura pawl hrang hrangte hmalakna leh intawhkhawmna hun buatsaih a ni thinte chu tha a tih thu a sawi bawk a. Ramin ri a nei a, hnamin ri a neih ve loh avangin Zofa hnam hrang hrangte kan inpumkhat leh zualna tur atana tanlak chhunzawm zel a pawimawh thu sawiin,  kalkhawmte chu Zofate tidarhtu ni lova, a kuahkhawmtu nih tum theuh turin a sawm a ni.

Kût thlengtu Pu K.Lalnunsanga'n kalkhawmte lawmna thu sawiin, Pu K.Roliana, President, MUP District Headquarters, Khawzawlin hunserh a hmang a. Chapchar Kût lawmnaah hian mizo hnam ziarang lang thei hrang hrang; zai, rimawi tum, infiamna leh intihhlimna hmuhnawm leh benglut tak takte enitira ngaihthlak niin, hun hlimawm tak hmanho a ni a, Mizo ei leh in hrang hrangte pawh chhawpchhuah a ni bawk. Khawpui thuthmun NGO Branch hrang hrangte bakah Kawlkulh Joint YMA, Khawhai Branch YMA, Rabung Branch YMA leh Ngaizawl Branch YMA ten hun an hmang bawk a. Chapchar Kût Miss bakah Mizo incheia inchei nalh, puitling leh naupang atangtein thlan chhuah a ni a. Pu K.Vanlalsiama, Chairman, Joint VC, Khawzawlin lawmthu sawina hun a hman zawhah Chai  hmangin Chapchar Kût lawmna hun hi khar a ni.