1476/2023-2024

Champhai the 12^th August, 2023 – Nimin August ni 11, Zirtawpni zan dar 7:30 khan Mizo Zirlai Pawl (MZP), Vengsang Branch, Champhai te chuan Vengsang YMA Hall ah Zirlai ti tha chawimawina hun an buatsaih a. Champhai North bialtu MLA & Vice Chairman, H&FW Board Dr ZR Thiamsanga chu khuallian niin Champhai DC Pu James Lalrinchhana chu khualzahawm a ni.

Zirlai ti tha chawimawina ah hian Champhai Vengsang huamchhunga graduate leh post graduate pass thar, first division leh a chunglam chin te chawimawi niin zirlai 19 ten chawimawina an dawng a ni.

Champhai North bialtu MLA & Vice Chairman, H&FW Board Dr ZR Thiamsanga chuan graduate leh post graduate first division leh a chunglam chin zirlai ti tha chawimawi tur mi 19 zet Champhai Vengsang in an nei chu thil ropui tak a ni tiin, zirlaite chu an hmalam hun zelah theihtawp chhuah chhunzawm a, ram leh hnam leh khawtlang tana chhawr tlak leh mi tangkai nih tum theuh turin a chah a. Mizo zirlaite thlavang hauh kawngah leh ram leh hnam humhalh kawngah MZP chu a hmatawngah awmin huaisen takin hma an la thin chu fakawm a tih takzet thu pawh sawiin kan khawtlang tana an hnathawh leh an inpekna avangin an chungah lawmthu a sawi a ni.

He huna khualzahawm Champhai DC Pu James Lalrinchhana chuan zirlaite hmakhua ngaia an tana chawimawina hun tha tak buatsaihtu MZP Vengsang Branch, Champhai te chu fakawm tiin, an hmalakna chuan zirlaite leh nu leh pa te ti phur tharin khawtlangah pawh nghawng tha tak a neih ngei a rin thu a sawi a. Mihring nunah hian zirna a tawp tak tak theilova, nitin thil thar inzir belh tur a awm zel a ni tiin zirlaite chu an zirlai textbook mai piah lamah tawng dang zir te, music zir te, lehkhabu tha chhiar thin te ching turin a chah a. Champhai District-ah zirna a hmasawn zel theinan MZP te hmalak pui chhunzawm zelah a sawm bawk a ni.

Zirlai Ti Tha Chawimawina program hi Zairempuia, Secretary MZP Vengsang Branch in a kaihruai a, Thangdeihmanga, President MZP Hqrs Champhai chu Uaptu niin Lalramnghaka, Fin Secy MZP Vengsang Branch in lawmthu sawina hun a hmang a ni.