1477/2023-2024
Aizawl the 14th August 2023 : Kum dang ang bawkin, rampum hmun dang rualin Mizoram hmun hrang hrangah pawh August ni 15 hian Independence Day chu ropui takin lawm a ni leh dawn.
Mizoramah chuan he ni puala lawmna inkhawm lian ber chu Lammualah August ni 15, 2023, zing dar 8:00 ah neih tan a ni dawn a. He hunah hian Chief Minister Pu Zoramthanga chu khuallian a ni dawn a. Lammualah Hnam Puanzar pawtparhin Parade Contingent te a endik anga, an chibai bukna te chhangletin March Past neih a ni ang. Chief Minister in Independence Day thuchah a sawi zawh hnuin National leh State awards te a sem nghal ang a, Parade contigents te hnenah lawmman a hlan bawk ang.
Lammuala Independence Day programme hman zawh a nih hnu chhun dar 11 ah sawm bikte tan Governor’s ‘AT HOME’, Raj Bhawan-ah a awm leh dawn a ni.
Mizoram sawrkar chuan he hun pawimawh tak hmang tur leh a hmanna hmunah te, tel theuh turin khua leh tui zawng zawng te a sawm a. A bik takin Sawrkar hnathawkte chu Independence Day lawmna programme-ah tel ngei tura hriattir an ni.
