103/2023-2024

Champhai, the 14th April, 2023: MHIP Hnahlan Block Meet- 2023, a tum khatna Hnahlan Community Hall-a neih chu nimin khan Health & Family Welfare Board Vice Chairman Dr. ZR Thiamsanga, Champhai North bialtu MLA chuan khuallian niin a hmanpui. He hunah hian Pi B.Sangkhumi, Vice President, MHIP Gen. Headquarters chu khualzahawm a ni.

Khuallian Dr. ZR Thiamsanga chuan hmeichhiate chu chhungkuaa hmun pawimawh tak luahtu leh hnam lungphum innghahna ti hiala mithiamte sawi thin an nih thu tarlangin, mihringte hi kan hnungzang ruh a chhiat chuan kan chhe vek, chutiang bawkin hmeichhia tel lo chuan chhungkua a ding thei lova, a kehchhe vek tihna a ni, a ti a. Block Meet thupui, 'Thianghlimna' tih chu thil pawimawh tak a nih thu sawiin, tipuitling turin kan zavaia kan tanrual a ngai a ni, a ti. Hmeichhiate hriselna Sawkarin a ngaihpawimawh thu a tarlang a. Health Sub-Centre-te B.Sc Nursing thutchilh Health & Wellness Centre a hlankai a nih tawh thu sawiin,  thawktute chhawr tangkai turin kalkhawmte a chah a. Khaw hrang hrangah MHIP Branch-te tan MHIP Rûn thuam that zel a nih thu leh, sak that  tur pawh a awm nual tih tarlangin, theihtawp kan chhuah zel ang, a ti bawk.

MHIP Hnahlan Block Meet vawikhatna hi Pi Lalbiaklawmi, President-in a kaihruai a, MHIP  Gen. Hqrs. Vice President Pi B.Sangkhumi, Padma Shree Awardee chu he hunah hian chawimawina hlan a ni a. Champhai atangin MHIP Sub-Headquarters President, Pi Lalhmachhuani Varte leh a thawhpui ten an hmanpui bawk a ni.