104/2023-2024

Champhai, the 14th April, 2023: Irrigation & Water Resources Department (IWRD) Minister Pu C.Lalrinsanga chuan tukin dar 9:30 khan PMKSY-Har Khet Ko Pani project kaltlanga siam, Mizorama buh leh thlai chawm nana leihnuai tuiverh hmalakna (Ground Water Irrigation Project) hmasa ber ni turin Tuipui (Mualbuhvum) Ground Water Irrigation Project (GWIP) chu Champhai leilet Mualbuhvum hmunah a hawng.

Hawnna pual inkhawm New Champhai Community Hall-a neihah Khuallian Irrigation & Water Resources Department Minister, Pu C.Lalrinsanga chuan Mizoramah ground water irrigation project kalpui dan turte uluk taka zirchian hmasak thin a nih thu sawiin, tlangram leh phaizawl dinhmun a inchen loh avangin ngaihtuahna sen ngun bik a ngai a ni, a ti a. Leihnuai tui chim chin ground water table North East-ah a that avangin hmalakna awm chhunte a hlawhtling deuh zel chu lawmawm a tih thu a sawi a. Leihnuai hausakna tui verh chhuah chu Sawrkar hriatpui lova duh dan dana kalpui ngawt a theih loh thu sawiin, hemi ven nan hian Dan  duan mek a nih thu a sawi a. Ruahtui van tla, a sur dan, leilunga hip luh leh luanral dan te, boruak hnawm dan leh thli kal dan te, ni sat dan leh lui tui luang zatte zirchianna National Hydrology Project (NHP) Real Time Data Acquisition System (RTDAS) Mizoram hmun 53 ah bun a nih thu leh 6 dang bun mek a nih thu tarlangin, hei hian tui neih dan leh hman tangkai dan tur thlengin min pui thei dawn a ni, a ti a. Champhai leh a chhehvelah pawh RTDAS 3 dah a nih thu sawiin, a venhim leh enkawl kawnga tawiawm tlat turin mipuite a sawm a ni.

Pu C.Lalrinsanga chuan Champhaia loneitute mamawh tak leihnuai tui verh hlawhtling taka zawhfel leh hawn a ni ta chu lawmawm a tih thu a sawi a. Pradhan Mantri Kisan Urja Suraksha evam Utthan Mahabhiyan (PM KUSUM) kaltlangin hmun hniam zawk atanga hmun sang zawka nizung chakna hmanga tui pump chhuahna, Solar Water Pump kalpui tura hmalak mek a nih dante a tarlang bawk.

Khualzahawm H& FW Board Vice Chairman Dr. ZR. Thiamsanga, Champhai North bialtu MLA chuan Mizorama leihnuai atanga tui verh chhuahna Ground Water Irrigation Project hmasa ber Champhaia hawn a ni chu lawmawm tih thu sawiin, a hlawhtlin theih nana Minister leh Department lama thawktute hmalaknaah lawmthu a sawi a. Ram leilung hausakna hai chhuak turin technology neihte chhawr tangkai thiam a tul a ni, a ti a. Champhai District-a Department hrang hrangte thawhhona tha tak awm chu fakawm tiin, chhawmnung zel turin a fuih a ni. 

Hawnna pual inkhawm hi Er. Lalrotluanga, Chief Engineer, IWR Department chuan a kaihruai a. Er. Beizawzi T. Azyu, Superintending Engineer (W&D) chuan technical report a pe a. Tuipui Ground Water Irrigation Project (GWIP) chungchang thlirhona neih niin, project chhawrtu loneitute atangin thusawi ngaihthlak a ni a. Er. Laldingliana Hrahsel, EE, Champhai Division-in lawmthu sawiin hun hman a khar a ni.

India ram hi khawvel puma leihnuai tui tling (groundwater) hmang nasa ber a ni a. Groundwater hman nasatna ber chu irrigation sector niin groundwater hman zawng zawng atanga 89% chu irrigation atan hman a ni. Mizoramah chuan irrigation atan groundwater hman a la ni meuh lova, Groundwater Irrigation Project 13 Mizoram hmun hrang hrangah a vawi khat nan kalpui mek a ni a; hengahte hian senso zawng zawng za a sawmkua hi Sawrkar laipui  Department of Water Resources RD&GD, Ministry of Jal Shakti-in a tum a, za zela 10 hi State-in a tum thung a ni. Heng project 13 thawh nan hian cheng nuai 1604.89 ruahhman a ni a. Sum ruahman zawng zawng hi sanction kim a la ni chiah lo nain, project 4 thawh zawh tawh a ni. Tuipui Ground Water Irrigation Project hi a hmasa ber atana hawn a ni.

Tuipui (Mualbuhvum) Ground Water Irrigation Project atana sum ruahman hi cheng nuai 99.10 a ni a. DPR hi Central guidelines leh norms hmanga siam a nih vangin tui verhna leh tui pump chhuahna bakah tui sem darhna tur canvas pipe 200 rm te hi project component tlangpui chu a ni. Tuipui GWI project-ah hian tubewell sawm panga (15) verh a ni a, heng tubewell sawm panga (15) te hi Solar pump pali (4) leh electric pump sawm pakhat (11) te hmanga tui lak chhuah a ni. Heng tubewell sawm panga (15) zinga paruk (6) te hi Department drill rig hmanga verh a ni a, a dang pakua (9) te hi private driller-te verh tir an ni.

Tubewell-te hi 150 mm Diameter a zaua verh a ni a, casing pipe thun nghal zel niin casing pipe atan hian PVC hman a ni a. Heng tubewell sawm panga (15) te hi feet 150 a thuk an ni tlangpui a, minute khatah tui litre 15-20 vel a pump chhuak thei a ni. Heng tui pump chhuahte hi canvas hose pipe hmanga sem darh a ni. A chawm tur ram (CCA) zau zawng hi hectare 31 niin, chhungkua sawmnga pahnih (52) ten chhawr thei tura beisei a ni a. He project hian loneitute'n an huan lo ram enkawl nan kumtluana tui hnianghnar an hmuh theih nana leihnuai atanga tui verh chhuah leh semkual chu a tum ber a ni a; hei hian thal leh thlasik thlai thar chhuah kawngah hlawkna a thlen ngei beisei a ni.