3788/2022-2023

Champhai, the 8th March, 2023: Champhaia Mizo Zaimi Inzawmkhawm (MZI) pawl din a nih aṭanga kum 40 tlin, Ruby Jubilee lawmna chu vawiin khan I&PR Auditorium, CHANEM Building-ah buatsaih a ni a. He hun hi Health & Family Welfare Board Vice Chairman Dr. ZR Thiamsanga, Champhai North bialtu MLA chuan khuallian niin a hmanpui a, Champhai District Bawrhsap Pu James Lalrinchhana chu khualzahawm a ni.

Khuallian Dr. ZR Thiamsanga chuan thu leh hla thiam leh zaimite chuan mite thinlung a ṭha zawnga an kaihhruai theih thu sawiin, ram leh hnam hmangaihna, hnam inpumkhatna, hlim leh lawmna leh lungngaih ber lai pawhin heng mite hi kan zavai atan mi ṭangkai tak an ni, a ti a. Zaimite chu zohnahthlak hnam chi hrang hrang hlate zira sa thiam tura chahin, khawvel hmun zau zawka invawrh chhuak thei turin Hindi leh Sap hlate pawh thiam tel ve zel turin a chah a. India ram mai ni lo, khawvel hriat phak khawpa invawrh san tum turin a chah a. MZI ten raltlan, kangmei tuar leh chhawmdawl ngaite ṭanpui tura charity concert an huaihawt ṭhinte chu fakawm a tih thu pawh a tarlang bawk a. MZI Hqrs. Champhai ten Ruby Jubilee an thleng thei chu lawmawm tiin, an kalzelna turah duhsakna a hlan a ni.

Khualzahawm District Bawrhsap Pu James Lalrinchhana pawhin thu sawiin, MZI Hqrs. Champhaiin kum 40 na hmel an hmu chu a lawmpui thu sawiin, midangte tana luanchhuahna leh rawngbawlna ngai pawimawh zel tur leh hmasawn tum deuh deuh turin a chah a ni.

MZI Hqrs. Champhai Ruby Jubilee lawmna hun hi an pawl Vice President Pu Ramfangzauva'n a kaihruai a. Champhaia MZI din a nih dante, an hmalak dan leh an pawl dinhmun tlangpui Secretary Pu Laltlanzova Pautu-in a report a. Chawhnu lamah concert buatsaihin, tlaiah Jubilee lawmna ruai an kilho nghal a ni.