698/2022-2023
Champhai, the 30th May, 2022: Samagra Shiksha hnuaia kalpui tan Rabung Higher Secondary School lawmna Rabung Community Hall-a neih chu vawiin khan Health & Family Welfare Board Vice Chairman Dr. Z.R Thiamsanga, Champhai North bialtu MLA chuan khuallian niin a hmanpui.

Khuallian Dr. Z.R Thiamsanga chuan Samagra Shiksha hnuaia Rabung khuaa Higher Secondary School kalpui a ni thei chu Rabung khaw tana ni chhinchhiah tlak tak a nih thu sawiin, din a nih theih nana Education Minister hmalakna leh thahnemngai taka tha thawhtute fakawm a tih thu a sawi a. Hripui leng avanga kum 2 zet nunphung a khaihlak hnuah nunphung pangngai zawha kir leh mek a nih thu sawiin, hrilengin Mizoram mai ni lo khawvel pum a nghawng a, duh anga hmasawnna ruhrel siam theih ni lo mahse a theihna zawnah hma lak zel a ni a, nitin khawsakna kawnga mipui mamawhte phuhruk a nih theih nan sawrkarin theihtawp chhuahin hma a la a ni, a ti.

Undivided Champhai District tana hriselna kawnga hmalakna hrang hrang; Champhai District Hospital-a ICU leh Dialysis khawl dah te, Trauma Centre changtlung tak siam chhoh leh, khum 50 awmna tur Champhai District AYUSH Hospital sakna tur tihfel tawh a nih thute a tarlang a. Natna khirh bik enkawlna Critical Care Hospital khum 50 sakna tur pawh sawrkarin a pawmpui tawh thu a sawi a. Zirlaite chu Higher Secondary School thar chu ?angkai taka hmanga, Mizoram pum zirna huang inelnaa lang phak tura nasa taka tan la turin a fuih a. School mamawh leh tul dangte ngaihtuah zel tum a nih thu sawiin an kalzelna turah duhsakna a hlan a ni.

Vawiin hun hmannaah hian Dr. Z.R Thiamsanga chuan Tuichang Group YMA te hman tur Computer Set a pe bawk.

Rabung Higher Secondary hi 2020 kum atang khan VC te hmalaknain kalpui tan a ni a. Kumin session 2022-2023 atang hian Samagra Shiksha hnuaiah lak thar niin sawrkar atanga hmalakna kalpui tan a ni. Tun dinhmunah pawl 11 admission hawn mek niin Zirlai 4 te ziahluh tawh an ni a, pawl 12 Zirlai 18 an awm mek a. Zirtirtu 6 awmin, Arts subject 6 a zir theih a, class hi Rabung High School-ah kalpui rih a ni.