No.2353/2020-2020

Aizawl the 23rd June 2020 : Siaha District COVID-19 Food Security Consultative Committee(SDCFSCC) chuan Chairman Dr K. Beichhua hovin vawiin khan a vawihnihna turin DC Conference Hall, Siaha-ah meeting an nei.

Chairman Dr. K. Beichhua chuan COVID-19 hrileng avangin ei leh bara harsatna lo thleng thei laka lo inruahman nan hmanhmawh takin SDCFSC Committee hi kumin April thla lai hawl vela din niin, a din tuk atangin hna thawk tanin; tihtur pawimawh Agri & Allied Sector, Animal Husbandry, Fish pond etc..te based line survey lak a ni a. Thlai chi leh thiltul dangte dap khawm zawh hnuah; May thla chawhnu atang khan vawiin ni thleng hian thei tawpin SDCFSCC hian hna a la thawk mek zel a ni. Vawiin meeting-ah hian SDCFSCC din tir atanga vawiin ni thlenga kan hmalak tawhna thlir ho leh kan hmachhawp te khun khan taka sawi ho tura thukhawm kan ni , a ti.

SDCFSCC thil tum lian ber chu Covid-19 avanga ei leh bar harsatna lo thleng thei hmachhawn tura kan inpuahchahna hian Siaha district hi thlak danglam se, hmalam hunah pawh ei leh bara district intodelh leh mahni ke a ding thei nih tir tura kawng kawhhmu leh sialsak hi a ni.

Dr.K.Beichhua chuan committee hmalakna hnuaiah loneitute kaltlangin thlai lamah chuan Siaha district a intodelh thei dawn nia a hriat thu sawiin, awm lo atangin bul tan an nih avangin duh ang thala chakin kal thei lo mahse; Food Security Committee hian a phak tawkah hmalam panin a kal bek bek reng a ni, a ti.

Dr.Beichhua chuan Ministry of Tribal Affairs in COVID-19 hrileng doletna atan Agriculture & Allied Sector-ah project proposal siam tura an hriattir thu sawiin, Agriculture, Horticulture, AH&Vety, Sericulture leh Fisheries lamah Mizoram pum tan Rs nuai 2500 hu project proposal an zuk thehluh tawh thu a sawi bawk.

Siaha District COVID 19 Food Security Consultative Committee chuan buhseng zawha thlasik thlai chin zui zel dan tur pawh a buaipui tel a ngai tih sawiin, hemi atan a department concern te pawh lo inbuatsaih lawk turin a chah nghal.

Member Secretary, Siaha DC aiawhin Addl. DC Malsawmtluanga chuan SDCFSCC hmalak tawhna report a tarlang a, Committee chuan a hmalakna hmasaah vaimim quintal 80 a semchhuak tawhin, chhungkaw 293 te Wet-Rice Cultivation (WRC) leilet hectare 144.6 chu JCB 14 hmangin lehsak zawh tawh niin, a vaiin darkar 1999 hrs JCB hian a thawk a ni.

Heng bakah hian Siasi leh Chakhei khuaa leiletah tui lakna a siamsak tawh tih a tarlang tel bawk.
Committee member, District Horticulture Officer, pawhin an Department kaltlangin tun hnaiah thlai chi quintal 6.92 a semchhuak tawh tih a tarlang a, Siaha, Tipa 'V' leh a chhehvel khuaah VLTF te kaltlanga semchhuah a ni, a ti.

Monitoring lam buaipuitu Joint VC Chairman leh MTP Headquarters President hnen atangin Report ngaihthlak a ni bawk a, Fall Army Worm (FAW) a rawn lan leh thu leh a dona atan District District Agriculture Office, Siaha atangin damdawi te pawh la in, loneitute hnenah pek an ni tih an tarlang. Monitoring lam buaipuitute chuan khawl neih that loh te, tui lakna tha lote chu loneitute harsatna lian ber pakhat a la ni tih an tarlang bawk.

SDCFSCC hnuaiah Society dinin, tunah hian subsidised rate in Society 5 chuan leilehna Tractor an dawng dawn a.Pakhat phei chu a lo thleng tawh a ni.

Vawiin meeting chuan SDCFSCC din hma leh din hnu-a kan thlai thar chhuah tam dan inthlauhna lo zir chiang turin DHO a ruata, Bu thar tam dan zir chiang tur leh nakum financial year atan Draft Action Plan buaipui turin DAO,GoM &MADC ruat a ni bawk. SDCF SCC treasurer atan PD,DRDA ruat a ni bawk.