Mizoramah drugs hmansual khauh zawk leh mumal zawka khuahkhirh anih theih nan Central YMA rawtna angin vawiin khan Chief Minister Pu Lal Thanhawla hovin Chief Minister’s Office Conference Hall-ah meeting pawimawh tak neih a ni.

Chief Minister chuan drugs zawrh avanga mante na taka hrem nise tih YMA lamin rawtna an siam chu duhdan an neihte sawi tura sawmin, CYMA Vice President Pu J.H.Zoremthanga chuan drugs hmansual chungchanga a tawlhrutu leh zuartu mante reilote chhung chauh hrem an ni thin chu a aia na zawk leh rei zawk hrem an nih theih nan sorkarah ah an lo thlen thin thu leh YMA conference ah pawh vawi hnih an lo passed tawh thu a sawi a. Meeting member hrang hrang ten drugs chungchang hi central subject anih thu te sawiin, Narcotics Drugs & Psycotropic Substances Act leh Drugs and Cosmetics Act a thilsual titu hremna dan awmte an sawi a. Tuna kan hman mek Assam Drugs Control (ADC)Act chu a hremnna lam aimaha drugs siam chungchang leh drugs licence chungchang anih thu sawi a ni a. Assamah ND&PS Act hmanga spasmo proxyvon kawltu an man, kum 10 chhung tang tura a chungthu an rel, High Court in kum 7 a a tihhniam sak chungchang sawilan a ni a. Chuvangin Mizoramah pawh hetianga hman anih ve theih nan Assam leh Meghalaya ah zirchiang tur la intirh nise meeting chuan a ti a. ADC pawh hi Mizoramin a adopt tawh avangin pawikhawihtu hremna dan pawh tun aia na zawka hrem an nih theih nan amend tul lai amend nise an ti bawk a.Tuna draft stage a la awm mek The Mizoram Drugs Control Act(Bill) chhawpchhuah chu central sorkar remtihna lak tur anih avangin la zirchian hmasak ni bawk se tih an ti a. CYMA lam atanga heng Dan chungchanga ATI a training an lo neih tawh chu an hlawkpui thu sawilangin, Chief Minister chuan hetiang training hi ATI ah neih leh thuai nise a ti bawk a ni.

Meeting-ah hian Ministers Pu Lalrinliana Sailo leh Pu Lalsawta te an tel a. Secretary to Government of Mizoram Pi Margaret Zohmingthangi, Pu Liankima leh Pu Singthanga te, DGP Pu Lalrokhuma Pachuau leh CYMA hruaitute leh MHIP aiawhte an tel bawk a ni.