2730/2022-2023

Aizawl the 19th November 2022 : Nimin khan Dr.Vanlaltanpuia, Chairman Mizoram Youth Commission leh Lunglei North bialtu MLA ni bawk chuan hun rei tak atanga Indian Armed Forces in Pukpui, Lunglei hmun an luah man (land rent) bat chungchangah Ministry of Defence South Block, New-Delhi te a dawr a. Ministry aiawh hian Rakesh Mittal IDES, Joint Secretary Lands & Works, Eddie L. Khawlhring ICAS, Additional Financial Adviser & Joint Secretary leh Director Defence Estate te'n Central Secretariat South Block New-Delhi ah an lo dawngsawng ani.

Mizoram buai kum 1966 atanga India Sipai in Pukpui ram an luah man ba kum sawmpanga (15) chhung an pek tawh loh (overdues) avang a mipui manganna te chu bialtu MLA anih angin Ministry of Defence hotute hnenah a thlen a; thuneitu chuan engvanga hun rei tak rent hi pe tawh lo nge an nih leh eng harsatnate avanga pek loh nge anih tih te lo enfiah thuai an tum thu in an lo chhang ani. Defence Ministry leh Mizoram State Sorkar in lehkha a an in dawr tawhna zawng zawng te lo enchhuah vek a, a theih anga chingfel tura hmalak an tum thu leh hun remchang hmasa ber a thlir ho leh nise tha an tih thu an lo hrilh bawk.