DURTLANG LEITAN - SIHPHIR ZAUH LEH SIAMTHATNA TUR KAWNG LAIH TAN A NI DAWN
3814/2022-2023
Aizawl, 11.03.2023: Chief Minister Pu Zoramthanga chuan vawiin khan Durtlang Leitan to Sihphir inkar kawng 10.25 km a thui zauh leh siamthat hna thawh tanna (work commencement) pualin lungphun a hawng. He kawng siam hna hi Central Road Infrastructure Fund (CRIF) atanga sum hmuh hmanga thawh tur Widening and Improvement of Aizawl - Durtlang - Lungdai - Kawnpui road project a section pakhat a ni.
Chief Minister Pu Zoramthanga chuan thu sawiin, helai kawng zauh project nawr chhuak tura kawng a khirhkhan thu leh tuna hna thawh tan a ni dawn ta chu lawmawm a tih thu a sawi a. National Highway anga compensation component dah a nih ve loh avanga helai kawng zauhna atana sawrkar ram bak ram lak hek ngai te chu compensation in pek theih a nih loh thu a sawi a. Chief Minister chuan hemi a nih avanga sawifel ngai a awm thu te, ram neitute leh khawtlang hruaitute leh tlawmngai pawl te thawk hova theihtawp chhuah a he kawng pawimawh tak hi tha taka kalpui a nih theih nan inhawng taka theihtawp chhuah tlan a ngaih thu a sawi a ni.
Chief Minister chuan Mizoramin hmasawnna ruhrel lian, a bik takin intlawhpawhna lama hmasawnna a hmuh chhoh dan chu lawmawm a tih thu a sawi a. Hmanlai hun atanga thlir a huphurhawm taka a ngaih - rel kawng nei te, kawng zau tha leh inkalpawhna dangte chu vawiinah chuan tangkai takin kan hmangin siam belh leh hmalak mek te a nih zel thu a sawi a. Beiseina nen hmathlir tha tak neih a, tumruhna nen umzui a hlawhtlinna a insiam thin thu sawiin, Mizoram hi humhim a hma a sawn theihna tur chuan keini a neitute hi kan pawimawh tih hre rengin theihtawp chhuah tlan a tul thu a sawi.
Kawng laih tanna puala Rohrenga Hall, Sihphir a inkhawm buatsaihah hian AMC Mayor Pu Lalrinenga Sailo leh Adviser to CM (Technical) Er. (Rtd.) K. Lalsawmvela te bakah PWD thawktu pawimawh an tel a. Inkhawm hi PWD Commissioner & Secretary Pu K. Lalthawmmawia chuan kaihruaiin PWD E-in-C Er. C. Lalchhuana chuan kawng siam dan tur report tlangpui a pe a. Pu Lallianfala, Sihphir Br. YMA President hnen atangin thusawi ngaihthlak ni bawkin Sihphir Venghlun VCP Pu Lalthantluanga chuan lawmthu sawiin hun a khar a ni.
■ Report:
• Specification:
1) A kawng chhuat zau zawng (Formation Width) - 8.00 m
2) A kawng Motor zawh tur chin (Carriage Width) - 6.00 m
3) A Kawng chhuat chhah dan tur (Pavement Structure) :-
a) Granular Sub-Base (GSB) - 100 mm thick
b) Dry Lean Concrete (DLC) - 150 mm thick
c) Cement Concrete Pavement - 250 mm thick
4) Kawng sir tui luan kawr (Pucca Side Drain) - 350 Rm
5) Retaining Wall leh RCC Frame Retaining Wall - 32 Nos.
6) Culvert awmsa zawm belh (Extension of RCC Slab Culvert) - 18 Nos.
7) Hume Pipe Culvert siam belh - 4 Nos.
8) Road Safety items leh Traffic signages
• Construction work:
1) Mode of Execution - EPC Mode
2) Name of Contractor - SLT Infracon Pvt Ltd.
3) Agreement Amount - Rs. 35,53,00,000
4) Hna thawh hun chhung - 18 Months
Aizawl - Durtlang - Lungdai - Kawnpui kawng hi Border Road Organization (BRO) te enkawl a ni a. A kawng hi a road Geometry (a chhuk chhoh dante, a kual ulh leh len zawngah te) duhthu a sam lo hle a. Chuvang chuan kum 2004 khan Aizawl - Durtlang inkar kawngpui bik hi siamthat a lo ni tawh a. Hemi hnu hian Leitan atanga 3.180 Kms pawh hi Intermediate-lane tura laih zauh hna thawh a lo ni tawh bawk a ni.
Durtlang Leitan atanga Sihphir khaw tawp thleng, 10.250 Kms chu Chief Minister hmalaknain tunah hian a kawng laih zauh hna te, kawng kual ulh leh chho ulh zual leh kawng chhuat siam hnate thawh a ni dawn ta a. Hemi atan hian Central Road Infrastructure Fund (CRIF) atangin pawisa Rs. 46.57 Crore hmuh a ni a. He kawng hi BRO enkawl a nih avangin a kawng enkawltu BRO hnen atangin PWD kuta hlan chhawn phawt a țul a, chu chuan hun a duh rei deuh avangin duh angin a hna hi tan hma thei ta lo a. Ministry of Defense atanga phalna hmuh hma chu BRO te'n No Objection Certificate an pe theilo a. Sawrkar laipui lamah sawrkar hotu ten bawhzui lehin Chief Minister in Union Minister of Defense a hmuh hnu ah NOC hi pek a ni ta a. Heng bakah hian sum hmuhna CRIF scheme hnuaiah hian Compensation in pekna tur sum dah tel a ni ngai lova. Chuvang chuan duh ang taka hna thawh theihna turin, kawng kama huan lo ram neitute phalnaah thui tak a innghat a ni. Kawng tha kan neihna tura lo in hawng zau leh phal zau turin a ram neitute ngen an ni a, Khawtlang hruaitu leh NGO ten theihtawpa hma lakpui tura ngen an ni bawk.
Aizawl - Durtlang - Lungdai - Kawnpui kawng hi Silchar to Aizawl inkar inkal pawhna hmasa leh Mizorama kawngpui neih hmasa ber zing a mi a ni a. Silchar to Aizawl via Sairang kawng hi National Highway a lo nih tak hnu pawhin helai kawng hi hun engemawchen Silchar panna kawngpui ber atana hman a ni.
