3815/2022-2023

Mamit 11th March, 2023 : Vawiin khan Chhimveng YMA Hall, Mamit-ah Mamit District Silver Jubilee lawmna neih a ni a. Pu Lalrintluanga Sailo, Dy. Govt. Chief Whip, Dampa bialtu MLA ni bawk chu khuallian niin Er. H. Lalzirliana, Mamit bialtu MLA leh Pu Lalrindika Ralte, Hachhek bialtu MLA chu khualzahawm an ni.

Khuallian chuan District kan nih Kum 25-na a lo ni ta chu lawmawm a tih thu sawiin dawmkan ngai reng District kan nih loh nan rilru thar kan put a ngaih thu a sawi a. Kan chenpui hnam hrang hrangte chu kan chenhopui thiam a pawimawh thu sawiin zirna leh thiamna lamah tan la thar zel turin a chah a. District Headquarter a chengte chu hmasawnna kawng engkimah hmahruaitu nih tum turin a chah bawk.

Tanrual chu chakna a nih angin Aspirational District kan nihna atanga kan chhuah theih nana theihtawp chhuahtu ni theuh turin District mipuite chu a sawm a. Hmasawnna pawt hniamtu ni lo tur leh midangte nek tum rana khawsa lo turin a chah bawk a ni.

Er. H. Lalzirliana, Khualzahawm chuan Mamit District-in Silver Jubilee kan hmang thei chu lawmawm a tih thu sawiin puitling zia nei a, lanchhuahtir zel turin leh hmasawnna lam kawnga kan rilru hmang turin kalkhawmte a chah.

Khualzahawm Pu Lalrindika Ralte pawhin thu sawiin Pathianin min siam chhan angin rawng inbawlsak tawn a, dinhmun sang zawka awmte'n dinhmun hnuaihnung zawka awmte theih ang tawka tanpui a, dawmkang thin turin kalkhawmte chu a chah bawk.

He hunah hian Pu Rohlupuia Chhangte chuan Mamit District chanchin sawiin hman leh tun dinhmun Documentary Video thlirhona neih a ni bawk.

Mamit District hi 3025.75 sq.km a zau niin Area zau zawngah Mizoram-ah pahnihna a ni a. March 1998-ah Aizawl West District ti-a District thar din niin tunah hian Village Council 89 leh Sub Village 10 a awm mek a ni.

Mamit District Silver Jubilee lawmna-ah hian Chapchar Kut 2023 Photo Competition result puanna neih nghal niin YMA zaipawl leh Mizo hnam lam thlirho anih bakah zaithiam lar tak tak zai ngaihthlak a ni bawk.

He hun hi Pu Lalnunhlua, Mamit District Bawrhsap chuan kaihruaiin kalkhawmte lawmna thu a sawi a. Pu Lalfakzuala, Addl. DC Mamit chuan lawmthu sawina a nei bawk. He hunah hian Mamit khawpui chhunga Sorkar Department hrang hrang hotute, Khawtlang hruaitu leh tlawmngai pawl hrang hrang aiawhte bakah thutharthehdarhtute an tel a ni.