3816/2022-2023

Khawzawl, the 11th March, 2013: Khawzawl District Bawrhsap Pu C.C. Lalchhuangkima chuan vawiin khan National Highway Infrastructure Development Corporation Limited (NHIDCL) hnuaia NH6 siam mek chu a hmunah kalin a endik a. Puilo khaw daia View Point Tower sakna tur lung a phum nghal bawk.

District Bawrhsap Pu C.C. Lalchhuangkima chuan NHIDCL hnuaia NH6 hnathawh mek chu beisei aiin a kaltluanga lawmawm a tih thu a sawi a. Company-te chu leilung leh nungchate ngaihtuah reng chunga hnathawk thin tur leh, lui humhalh tlat turin a chah bawk a. View Tower sak a ni tur chu lawmawm a tih thu a sawi a. Kawng siam zawh a nih hunah chuan khualzinte hiptu ber tur leh zin ti nuamtu a nih dawn avangin lawmawm a tih thu a sawi bawk.

Khawzawl District Bawrhsap chuan Anusha Projects Private Limited (APPL) Company ten NH6 kawng an siam meka leivung an paih dante leh, tuisen lui ti chhe lo tura hmalak dan turte APPL hotute a sawipui a. APPL lam hian an theih chinah gabion wall an siam thute, lui tui luang tichhe thei tur lung lian leh leivung luia lutte pawh an then fai mek thute an sawi a. DC rawtna angin remchang hmasa berah leivung an paihna hmunahte thing an phun tur thu an sawi bawk a. DC hian a hmunah kalin an gabion wall dahte pawh a endik a, hmalak zel dan tur zau takin a sawipui nghal a ni.

Hemi hnu hian NHIDCL hmalaknaa View Point Tower, Puilo khaw daia sakna tur lungphum a phum a. He tower hi NH6 kawng siam mektu Dhariwal Builtech Limited (DBL) company ten an siam nghal dawn a ni. Lungphum phumna hunah hian NHIDCL leh DBL atangin mi eng emawzat an tel  bawk a ni. View Tower hi Mizopa chhiarin chhawng 5 a sang a ni dawn a. Tower bakah hian caretaker awmna turte, mipa leh hmeichhe in thiarna turte, motor park-na turte a awm tel dawn bawk a ni. Tower san zawng hi lei atangin 17.4 metre a ni dawn a, NH6 an siam zawh ruala hawn hman tura ruahhman a ni bawk.

Ministry of Tourism kaltlangin Assistance to Central Agencies for Tourism Infrastructure Development hnuaiah NHIDCL hian view tower NE state 6 ah sakna tur a hmuh atangin Mizoramah pawh 9 lai sak a ni dawn a. Sak zawh a nih hunah Tourism Department-in an enkawl chhunzawm dawn a ni.

View Point Tower sakna tur lung phumna hun hman zawh hian inkawmhona hun DBL company Office, Puilo-ah hman a ni a. NHIDCL lam chuan kawng siamna tura an hmachhawpte, an thlen chinte leh harsatna an tawhte an lo sawipui a, hmalak zel dan tur uluk takin an ngaihtuah nghal a ni. DBL company ten kawng siamna tura quality testing an kalpui dante a hmunah a endik nghal a, an laboratory result-te pawh a enfiah a. DBL company hiam Amrit Sarovar hnuaia dil siam turah CSR angin dil 1 a thlawnin khaw thenawm remchang tan an siamsak theih tur thu DC hi an hrilh bawk a ni.

Khawzawl DC Pu C.C. Lalchhuangkima hi Pu Obed Lalmalsawma, SDC Khawzawl chuan a tawiawm a ni.