2783/2022-2023
Dated Serchhip, the 24th November, 2022: Vawiin khan Deputy Speaker, Er.Lalrinawma chuan a bial chhung khua Ngentiang Health Clinic Centre thar a hawng.

Khawtlang huapa a lawmna inkhawm buatsaihah Er.Lalrinawma chuan, hriselna hian ram leh hnam intodelhna leh hausakna a nghawng a, chhungkaw tinte intodelhna pawh a hril tel a ni, chuvang chuan mipuiten hriselna tha kan neih tlan theih nan nun kawng thianghlim leh tha kan zawh a tul a. Hriselna lama harsatna kan tawhin a rang lama inentir nachang kan hriat pawh a tul hle. Ngentiang khawtlangin kan hriselna thua kan pan zung zung theih tur Health Clinic Centre thar kan nei hi a lawmawm hle a, tangkai taka lo hmang turin ka chah che u a ni, a ti. Thianghlimna hi hriselna kailawn pawimawh a nih avangin ei leh in thuah te, taksa enkawl kawng tinrengah te, in leh a chhehvel enkawl danah te thianghlimna kan ngaipawimawh tur a ni a, mitinin chutianga thianghlimna kan ngaihsak chuan khawtlang thianghlim leh hrisel kan ni mai dawn a ni, a ti.

He hunah hian Pu Lalramlawma, Health Superviser, Ngentiang PHC, pawhin thusawiin mipuite hriselna ngaihsaka theihtawp chhuah saktu Bialtu MLA Er. Lalrinawma chungah lawmthu a sawi a. Clinic Centre thar chu mipuiten an tangkaipui hle dawn tih a sawi a ni.

Health Clinic Centre thar hawnna hi Ngentiang PHC mual ah Pu Herman Tlangkunga, Vice President, kaihhruaina hnuaiah neiin, a lawmna inkhawm hi  Ngentiang Comunity Hall ah hman zui a ni a. A lawmna inkhawm hi Pu Felix Vanlalfela, VCP, in kaihruaiin MHIP, MUP, YMA aiawh ten thusawina an nei a ni.