2720/2022-2023
Dated Serchhip, the 18th November, 2022: Vawiin khan Er. Lalrinawma Dy. Speaker, Mizoram Lagislative Assembly chuan Gov't. Model English Medium School, Nursery Veng, Aizawl in kum 60 an tlin lawmna hun an buatsaih chu khuallian niin a hmanpui.

School tualah Diamond Jubillee lungphun hawnna a neih zawhin a lawmna inkhawm buatsaih zui a ni a. He hunah hian Er. Lalrinawma chuan, Government Model English Medium School ten Pathian hruaina changa Diamond Jubillee hial lawm theia an awm chu ropui a tih thu sawiin, hetiang hun thleng thei tura bul lo tantute, he school a lo thawktawhte leh thawklai zawng zawngte leh a neitu veng mipuite chungah lawmthu a sawi a. Tluang taka hun rei zawk an kal chhoh zel theih nan duhsakna a hlan bawk. He school hian mithiam tam tak leh mi puitling leh chhuanawm tak tak an chherchhuah teuh tawh a rin thu tarlangin, tuna zir mek zirlai naupangte chu nu leh pate tana phurrit ni lova, an theihna apianga tanpuitu nih tum tur leh ram tana chhuanawm leh tangkai mithiam nih tum tlat turin a fuih a ni. Kan ramah zirna bakah zonun zemawi leh nun dan tha dangte inzirtir uar a tul thu pawh sawiin zirtirtuten thahnemngai takin naupangte kawhhmuh thin se a duh hle tih a sawi a ni.

Pu Zohmingthanga, Joint Director, School Education Department pawhin thusawi tawi neiin, kum 60 tling thei sawrkar school lawmna hun an hmang thei chu thil lawmawm tak a nih thu a tarlang a. Zirna school tlo leh tha tak kum 60 chhung nei theitu Nursery Veng khawtlang hruaitute leh zirtirtu ni mek leh ni tawh zawng zawng chungah lawmthu a sawi ni.

He hunah hian Ch. Lalnunmawia, Chairman Local Council, Nursery Veng leh YMA, MHIP, Nursery Veng Presbyterian Commitee aiawh ten thusawina hun an hmang bawk.

Diamond Jubilee lawmnaah hian Rev. F. Lalchhuanawma'n hun serh a hmang a. Pi Rinhmingliani Ralte, Headmaster in lawmthu sawiin hun neiin, zirlai nu leh pa thahnem tak nen hun an hmang a ni.